Upat ka balay ugdaw sa sunog
CEBU, Philippines — Nikabat ngadto sa P250 mil ang danyos sa nahitabong sunog kagahapon sa buntag diha sa Sitio San Isidro, Barangay Poblacion, Lungsod sa Sogod.
Nadawat sa kabomberohan ang alarma sa maong sunog alas 10:08 sa buntag ug giisa kini ngadto sa 3rd alarm mga alas 10:18 ug nakontrolar ang kayo sa sunog mga alas 10:50.
Ang kayo sa sunog gikatahong nagsugod sa ikaduhang andana sa panimalay nga gipanag-iya ni Rogelio Monsanto nga giingong gihimo nga bodega.
Matud ni Fire Officer 2 Maria Remma Brigoli, chief operation sa Sogod Fire Station nga upat ka panimalay ang hingpit nga naugdaw ug duha ang partial nga nakan-an sa kayo.
Si Brigoli nagkanayon nga ipaubos pa nila sa imbestigasyon ang maong insidente.
Gibana-banang niabot ngadto sa P250 mil ang danyos sa sunog ug wala hinuoy natala nga naangol o nakalas sa maong insidente.
Gikatakdang ipatawag sa kabomberohan ang tag-iya sa panimalay alang sa ipahigayon nga pakisusi pagsuta sa hinungdan sa pag-ulbo sa kayo. (BANAT NEWS)
- Latest
