Kahuot sa trapiko sa south gilauman karong Domingo

CEBU, Philippines – Ang traffic czar sa Probinsiya sa Sugbo Jonathan Tumulak niawhag sa publiko nga mobiyahe ngadto o gikan sa habagatang bahin nga magplano daan ug kon mahimo nga i-reschedule ang ilang biyahe aron mamenosan ang posibleng paghuot sa trapiko sa dalan Natalio Bacalso Avenue ilabi na ang habig  sa Siyudad sa Naga.

Ang Siyudad sa Naga maoy napili nga mo-host karong tuiga sa pagpahigayon sa Sun Life 5150 Triathlon karong umaabot Abril 28 gikan sa alas 5:00 sa buntag ngadto sa alas12:00 sa udto.

Ang usa ka lane sa karsada sa siyudad siradohan aron himuong race course ug gipaabot nga makasinati og kahuot sa trapiko karong adlaw’ng Domingo.

Si Tumulak, focal person sa traffic management sa Probinsiya sa Sugbo nagkanayon nga gawas sa ilang public advisory adunay mga lakang nga buhaton aron hapsay ang dagan sa trapiko panahon sa road closure karong Domingo.

Sa maong adlaw gidili ang pagparada  sa mga sakyanan subay sa race course nga anaa sa northbound lane (seaside) sa N. Bacalso Avenue gikan sa Barangay Inayagan hangtud sa Barangay Tina-an. Ang susamang lagda pagabuhaton usab sa pikas nga lane (southbound o mountain side) nga maoy gamiton isip two-way passage alang sa mga sakyanan nga mogikan o padulong sa Siyudad sa Sugbo. Si Tumulak niesplikar nga ang maong no-parking policy ipatuman gikan sa alas 12:00 sa tungang gabii hangtud sa alas 12:00 sa udto sa adlaw’ng Domingo ug kadtong dili motuman sa maong balaod i-towing ang sakyanan niini.  Sa laing bahin, aron maminosan ang gidaghanon sa mga sakyanan nga moagi sa national highway adunay alternatibo nga rota alang sa mga mobiyahe ngadto o gikan sa Siyudad sa Toledo.

Gamiton sa mga motorista ang sudlonon nga dalan sa Inayagan og molapos ngadto sa Barangay Pangdan.

Apan mga light vehicle lang ang pweding makagamit sa alternatibong rota sama sa motorsiklo, van-for-hire ug pickup truck.

Adunay mga traffic enforcer nga ikatag sa kadalanan sa Lungsod sa San Fernando ug Minglanilla aron sa pagtabang sa Naga Traffic Unit ug adunay gatusan usab ka barangay tanod nga i-augment isip road marshals aron sa paggiya sa mga motorista sa saktong direksiyon. (/BDB)(BANAT NEWS)