11 ka balay naugdaw sa sunog
CEBU, Philippines – Gibana-banang mokabat sa P95 mil ang danyos sa sunog nga niulbo diha sa Sitio Upper Hermag Village, Barangay Pagsabungan, Dakbayan sa Mandaue , niadtong Miyerkules sa hapon.
Nadawat sa kabomberohan ang alarma sa sunog alas 5:51 sa hapon ug giisa ngadto sa third alarm.
Ang kayo sa sunog hingpit nga nakontrolar alas 7:34 sa gabii diin giisa kini ngadto sa third alarm.
Ang kayo sa sunog giingong nagsugod sa ikaduhang andana sa panimalay nga gipanag-iya ni Mercedes Aliguay.
Ang kabomberohan nagpahigayon pa kini og imbestigasyon sa hinungdan sa maong sunog.
Matud ni Senior Fire Officer 1 Noel Codilla, fire and arson investigator sa Mandaue City Fire Bureau niabot ngadto sa 11 ka panimalay ang naugdaw sa maong sunog.
Hinuon walay natala nga naangol sa maong hitabo. (Romeo T. Limpangog/BDB)(BANAT NEWS)
- Latest
