Walay trabaho atol sa 'Kadaugan sa Mactan'

CEBU, Philippines – Gilauman  nga labing daghan  ang magtapok  nga mga tawo sa gipalapdan nga Liberty Shrine  Plaza sa Barangay Mactan sa dakbayan  sa Lapu-Lapu  karon Sabado Abril 27 niining  tuiga nga mao usab ang adlaw sa pagsaulog sa ika-498  nga kasaulogan  sa Kadaugan sa Mactan

Nunot  usab kini sa pagdeklarar  ni Presidente  Rodrigo Duterte   pinaagi sa Republic  Act 110401  nga nag-ingon nga sa maong adlaw sa Abril 27 ang lukop nasud  ubos sa Special  Public Holiday  ug Special Non  Working   Holiday   sa tibuok Dakbayan  sa Lapu-Lapu.

Gihimo ni Presidente ang maong adlaw nga Special Non Working Holiday   kay  sa ingon nga paagi ang tanan nga mga Oponganon ang kahatagan gayod og igong panahon sa pagpakighiusa sa maong kasaulogan sa  pagsaksi  sa gihan-ay  nga kalihokan.

Giatangan ang pagdagsa  sa mga politiko  nga  mosaksi ug mahimo usab kini nga kabahin  sa ilang pagpangampanya  sa ilang kandidatura kay wala man kini makalapas  sa gilatid nga lagda sa Commission on Elections.

Kay bisan si  Lapu-Lapu City Mayor Paz Radaza nga nahinabi  sa  mga tigbalita miingon man nga  bisan kinsa nga politiko o mga senatoriables nga motambong sa kalihukan dili gayod  nila did-an  tungod kay  alang man sa tanan ang maong  kasaulogan nga pagahimoon.

Gibutyag  hinuon ni Mayor  Radaza  nga dili politiko ilang keynote  speaker  karong tuiga apan iyang giklaro nga adunay   suod ni Presidente Duterte  nga politiko nga ilang gidapit ug misanong na usab sa pagtambong niini.

Dugang nga masaksihan nga naglambigit sa maong kalihokan mao ang indigay sa kaanyag alang sa mamahimong koronahan nga Rayna Bulakna ug sundan usab kini sa  tinuig nga   Rampada  nga pagaapilan  sa  30 ka barangay  sa mga barangay sa dakbayan. —Romeo  T. Limpangog/LPM (BANAT NEWS)