Most wanted ug kauban, Walo ka pusher sikop

CEBU, Philippines — Nasikop sa kapolisan ang most wanted person sa Dakbayan sa Talisay lakip ang kauban niini niadtong Lunes sa hapon diha sa Sitio Crusher, Barangay Lawaan 3 sa maong siyudad.

Ang suspetsado mao si Karl Quimada, 20, kinsa top 3 most wanted ug ang iyang kauban nga si Dave Saberon, 22-anyos, pulos nagpuyo sa nahisgutang lugar.

Si Police Major Ardeolito Cabagnot, deputy chief sa Talisay City Police Station nagkanayon nga bitbit nila ang warrant of arrest batok kang Quimada sa kasong pagpangawat ug murder.

Apan sa pag-abot nila sa lugar ilang naabtan ang presensiya ni Saberon.

Si Quimada nakuhaan og usa ka kalibre .45 nga pistola nga adunay upat ka bala ug si Saberon nakuhaan usab kini og samang kalibre sa  armas nga adunay tulo ka bala.

Giingong ang mga suspetsado responsable sa mga insidente sa pagpamusil ug pagpanaka og mga balay sa siyudad.

Matud ni Cabagnot nga ang mga suspetsado maoy giingong sugoon sa mga nalambigit sa ilegal nga drugas sa pagpatay sa ilang mga kompentensiya nila.

Sa laing labahin, walo ka suspetsadong drug pusher ang nasikop sa managlahing buy bust operation sa kapolisan sa Lungsod sa Cordova ug Borbon samtang usa usab ang nadakpan sa  paghupot og armas sa niaging gabii.

Nasikop nila ni  Police Captain   Efren  Diaz, Jr., hepe sa Cordova Police  Station diha sa Purok 2, Barangay  Gabi  sila si Rizalinda Abella, 50-anyos; Erica   Molde, 52; Archie Dico, 24  ug  Roxan Dico, 44, pulos nagpuyo  sa maong dapit.

Nasakmit gikan sa mga suspetsado ang napulo ka gagmay nga paketeng shabu ug P300 nga buy bust money.

Samtang ang grupo ni Police  Lieutenant  Samuel  Gerra  Negro, hepe sa  Borbon  Police  Station nakasikop nila diha sa Barangay  Cadaruhan sila si Elmer Mayol  Taghoy, 34, taga Sitio Highway,  Barangay  Cadaruhan ug nasakmit gikan kaniya ang upat ka gagmay nga paketeng shabu ug P300 nga buy bust money.

Laing nadakpan sila si Elmer Montegrande ug Necolas Jordan Monera, Jr., pulos hingkod ang panuigon ug nasakmit gikan kanila ang P2,632 nga kantidad sa shabu.

Lakip usab sa nasikop si Albi Cases, 36, taga Sitio Banica, Barangay Lugo, Lungsod sa Borbon kinsa nasakmitan og kalibre .38 nga revolver.

Sa laing bahin usab, nasikop sa grupo ni Police Major Joemar Pomarejos, hepe sa Water Front Police Station diha sa Sitio Mohon 1, Barangay Tisa, Dakbayan sa Sugbo kagahapon sa kadlawon si Marvin Bordo, 22, ulitawo, reisdente sa maong dapit.

Ang kapolisan nakadawat og report kalabutan sa giingong pagpamaligya og ilegal nga drugas  sa suspetsado.

Nasakmit gikan kang Bordo ang mga pinutos sa ginadili nga drugas nga motimbang tanan ngadto sa 2.17gramos ug nikantidad sa P15 mil, buy bust money ug sudlanan sa ginadiling drugas. BDB (BANAT NEWS)