P45M danyos sa huwaw sa probinsiya

CEBU, Philippines — Nikabat na ngadto sa P45.850 ang "monetary damage" sa Probinsiya sa Sugbo tungod sa huwaw matud sa Provincial Disaster Risk Reduction and Management Office (PDRRMO).

Base kini sa mga gisumiter nga datos nga danyos sa kalungsuran ngadto sa PDRRMO.

Nikabat ngadto sa 34 ka Local Government Unit (LGU) ang nakasumiter og assessment sa epekto sa huwaw sa tagsa tagsa niini ka lugar apan pipila lang niini ang validated na ang report nga gisumiter matud ni Rhee Telen, Jr., disaster officer sa PDRRMO.

Matud ni Telen nga ang uban wala nakahatag og quantity o value o kantidad sa danyos nga mao karon problema sa PDRRMO. Sa mga LGU nga naghatag na og report nikabat ngadto sa P14.192 million ang danyos sa agrikultura ug P836 mil ang sa livestock.

Si Telen niawhag sa mga municipal agriculturist nga mohatag og detalyado nga damage report aron makuha gyud ang kantidad sa danyos.

Ang PDRRMO nag-purchase request na og kapin sa P23 milyones gikan sa quick response fund aron nga makahatag na og ayuda sa kalungsoran.

"Ang mahatagan og priority o hinabang are those who have submitted with complete details or datas",  matud ni Telen.

Sa QRF sa Kapitolyo, P10 milyones niini sa food packs, P9 milyones sa water pumps, containers lakip na hose; P3 milyones alang sa generator set sa mga isla nga adunay tubig apan walay water pumps; P1.2 alang sa veterinary supplies.  (/BDB)(BANATNEWS)

P1.3 shabu sakmit sa managlahing drug operations

Camille L. Pateres

CEBU, Philippines — Nikabat ngadto sa P1 milyon ang balor sa ilegal nga drugas nga nasakmit sa kapolisan kagahapon gikan sa 19-anyos nga suspetsadong drug pusher diha sa Sitio Banawa, Barangay Guadalupe, Dakbayan sa Sugbo.

Ang suspetsado mao si Joshua Sudario, residente sa Sitio Kawayan, Barangay Guadalupe.

Si Sudario giingong napalitan sa poseur buyer sa polis og usa ka medium size nga pakete sa gituohang shabu.

Ug sa paghiling sa polis kang Sudario laing tulo ka bulto sa shabu ang napalgan.

Ang drugas nga nasakmit gikan sa suspetsado nitimbang tanan ngadto sa 150 ka gramos ug nibalor ngadto sa P1 milyon base sa Dangerous Drugs Board Value.

Si Police Major Kenneth Albotra, hepe sa Cebu City Police Station 6 nagkanayon nga posibleng aduna pay laing kliyente si Sudario nga iyang hatdan sa maong mga shabu sanglit usa ra ka medium size ang ilang gi-order niini.

Sa laing bahin, nasikop sa managkalahing buy bust operation sa kapolisan sa niaging Huwebes  Santo ang 10 ka pusher ug giingong nasakmitan kini og duha ka dagkong pakete ug unom ka medium size nga paketeng shabu nga mobalor tanan sa P300 mil.

Sa Barangay Pulang ug Maslog sa Dakbayan sa Danao nadakpan ang pito ka suspetsadong pusher nga sila  si  Ruel Tanjay, 36 -anyos; Jenny Pasoy, 44;    Richard  Capungan,  44;  Cris Leo  Mata, 27; Alex   Gonzales, 42; Ian  Roy  Gungob, 34;  Danilo Batican, 49 parehong nagpuyo sa maong dapit.

Laing nadakpan mao si Paul   Bryan Pasaol Villavelez, 31-anyos, taga  Purok 6  Barangay  Nangka, Lungsod sa Consolacion ug nasakmitan sa kapolisan og 10  ka gagmay  nga paketeng shabu, P300 nga marked money ug P700 nga gituohang halin sa ilegal nga drugas.

Sa Barangay Dapitan, Lungsod sa Cordova nadakpan si Pablo Baguio Jadormeo, 44 ug Fredelito Cabordo Bautisa, 47, parehong residente sa maong dapit ug nasakmitan og lima ka gagmay nga paketeng shabu ug P300 nga buy bust money. (Romeo T.Limpangog/BDB)(BANATNEWS)