P3.4M shabu nasakmit
CEBU, Philippines — Duha ka mga lalaki ang nasikop atol sa follow-up operation nga gihimo sa Special Operations Unit 5 PNP DEG nga gipangulohan ni Police Supt. Glenn Mayam, uban sa Police Station 1 sa Cebu City Police Office sa may Imus Avenue, Barangay T. Padilla Dakbayan sa Sugbo niadtong Domingo sa gabii.
Ang mga nasikop mao sila si Wendy Viscayno, ug Erwin Go. Ang mga dinakpan nasikop human sa follow-up operation sa unang mga nasikop nga sakop sa illegal drug group nga naglihok sa Sugbo.
Nasakmit gikan sa mga dinakpan ang mga pinutos sa ginadili nga drugas nga motimbang ug 500 gramos nga mobalor og P3.4 milyones base sa Dangerous Drug Board Value ug ang buy-bust money.
Dul-an sa usa ka bulan nga gimonitor ang mga dinakpan kinsa nasakop sa usa ka dako nga drug group sa Sugbo.
Gitug-an ni Mayam, padayon ang ilang monitoring karon sa ugat sa maong grupo aron ilaha kini nga masikop.
Samtang usa ka 35 anyos nga lalaki ang gidakop sa Deca Homes Subdivision Phase 1, Barangay Dumlog, Dakbayan sa Talisay sa samang adlaw.
Ang dinakpan mao si Abraham Maneja,35, kinsa matud pang Chief Insp. Ardeolito Cabagnot, deputy chief sa Talisay City Police Station gireklamo sa mga silingan nga namaligya kini og ilegal nga drugas.
Nakuhaan siya og unom ka gagmay nga pakete sa shabu ug duha ka medium nga pakite sa shabu nga nitimbang og 4.8 gramos nga adunay balor nga P42 mil pesos. (BANAT NEWS)
- Latest
