Magtiayong HVTS gipatay

CEBU, Philippines —  Patay ang magtiayon human sila gipusil  sa riding-in-tandem samtang sila nagsakay sa ilang motor ug nag-urong tungod sa stop signal diha sa eskina sa Sotero B. Cabahug St., ug A.C. Cortes  Avenue  sa Barangay Ibabao Estancia sa Dakbayan sa Mandaue sa alas 11 pasado sa gabii niadtong adlaw nga Domingo.

Ang nakalas naila nga sila si Michael Canes ug asawa niini nga si Fraldine Kate Canes pulos nagpuyo sa Purok Limonsito sa Barangay Umapad sa maong dakbayan.

Wala ra hilabti sa mga mamumuno ang 8-anyos nga anak sa duha nga ilang kauban nianang pagkahitabo.

Matud pa ni Polic Colonel Julian Entoma, Mandaue City Police Office Director nga nahinabi sa Banat News, ang unang teoriya sa imbestigador sa Station 1, tulis ang motibo.

Apan ilang nasayran nga ang mga nakalas nalakip kini sa drug watchlist human nalambigit kini ngadto sa shabu queen nga si Joy Encila kinsa nasikop sa Lungsod sa Consolacion.

Sumala pa ni Entoma, ang nangamatay adunay alyas nga Boss Michael ug Madam Fraldine.

“Ang kani nga couple, labot ni sa 3,600 plus nga verified individuals under the watchlist. This couple is among the 3,600 verified individuals under the watchlist),” matud pang Entoma bahin sa berepikasyon nga gihimo niadtong Oktubre 2018. Tungod sa kalambigitan sa ilegal nga drugas, ilaha karong subayon ang koneksyon niini sa kamatayon sa magtiayon.

Matud ni Entoma nga dili tulis kondili pagpatay gyud ang tumong sa mga mamumuno ug gituohan sab nilang ‘internal cleansing’ kini sa sindikato.

Dugang pa ni Entoma base sa ilang nakuhang mga impormasyon ang mga biktima maoy tighatud og ilegal nga drugas ngadto sa dealers kay dili sila maoy direktang makigsabot sa mga mamalit.

Si Entoma nitug-an nga gikonsiderar nilang high value targets ang duha nga nailhan lang nila sa ilang mga codename.

Padulong mopauli sa ilang balay gikan sa North Bus Terminal ang duha gikan naghatod og mga padala kuyog sa ilang anak diha sa may Mandaue Coliseum apan pagabot sa maong eskina samtang nagpaabot sa go signal, gituparan sila og motorsiklong gisakyan og duha ka mga lalaki.

Base sa nakuha sa footage sa CCTV camera sa siyudad, gipusil dayon sa mamumuno si Michael ug pagkatumba giapil pagpusil ang babaye ug gikuha ang bag niini.

Ang bata kasamtangan usa kini iturn-over sa CSWS ug kaya sa mga paryente niini adto ra kini sa ilaha.

Ang igsuon ni Fraldine nga si Gernnybe Ramayla nanawagan og lawom nga imbestigasyon bahin sa pasangil sa kapolisan.

“Any of you can investigate and ask everyone in our neighbourhood if naa ba jud silay binuhatan ingon ana. You don’t know anything about them, about our family. So please know the details before judging,” matud pa sa iyang komento sa The FREEMAN Facebook page.

“I’m sick of those people making the victims looks like the criminals. We would be guilty if they are, but they are not. Witnessed ang tanan taw kaila nila unsa sila nagsugod. Nagsugod ra sila sa zero, dili dali-dali ilang naagian before sila na successful,”dugang pa niya. Apan si Entoma miingon  nga iyang girespeto ang katungod sa pamilya nga ipanghimakak ang impormasyong naa kanila. (BANAT NEWS)