Bus drivers ug konduktor sa CSBT gipang drug test

CEBU, Philippines — Gipaubos sa kinalit nga drug test ang mga konduktor ug drayber sa mga bus sa Cebu South Bus Terminal (CSBT) ingon man sa Cebu North Bus Terminal sa Mandaue City kagahapon dungan sa pagpahugot na sa seguridad sa maong mga terminal.

Ang maong drug test, usa ka joint operation sa kadagkoan sa Philippine Drug Enforcement Agency (PDEA), PNP, Land Transportation Office, Land Transportation Franchising and Regulatory Board (LTFRB) ug sa Kapitolyo.

Matud ni Jonathan “Joy” Tumulak ang operations manager sa CSBT, nga target nilang mapaubos sa drug test ang 600 ka mga bus drivers ug konduktor sa terminal. Pagsiguro kini nga walay nalambigit sa illegal nga drugas sa maong mga personnel ug pagsiguro nga luwas ang pagbiyahe sa mga pasahero nga mopauli sa habagatan ug silingang lalawigan sa probinsya sa Sugbo karong Semana Santa.

Agi og pagpangandam, adunay 12 ka mga bus ang gipadala sa nagkadaiyang LGUs - Oslob (1), Carcar  (4), Dumanjug (4), Naga (1) ug duha sa Kapitolyo.

Ang maong mga bus maoy ipagamit kun mag nihit na ang mga bus sa terminal ug maoy mohakot sa mga priority passengers.

Sulod sa terminal, si Tumulak nagkanayon, susama ra ang naandan nga sistema matag peak season, kon diin maglinya ang mga pasahero.

Aron dili, laayan adunay tulo ka Wi-Fi nga gi-install sulod sa terminal, ang CSBT, Smart ug Google WiFi aron nga dili laayan ang mga pasahero samtang gahulat sa ilang mga bus.

“Usa sa mga pamaagi aron ma-updated sa dagan sa traffic sa ilang mga destinasyon kay gidasig man nato ang mga PIO and traffic managers to post sa dagan sa traffic sa ilang mga lungsod,” matud ni Tumulak. Sa pikas bahin, ang Mandaue City Police Office (MCPO) naghigpit sa pag-inspeksyon sa mga bagahe sa mga pasahero diha sa CNBT aron pagsigurong way makalusot nga kontrabando.

Ang Presinto 2 nagdugang og mga polis nga mobantay sa Cebu  North  Bus Terminal (CNBT) pinaagi sa pagdugang og puwersa sa kapolisan gawas sa mga K9 Dogs. (BANAT NEWS)