Suspek ni Silawan makaabli sa tulo ka FB account
CEBU, Philippines — Ang suspek sa pagpatay kang Christine Lee Silawan giingong makaabli sa tulo ka mga social media account nga gigamit pagpakig-chat sa biktima.
“Yes, including the other facebook account, we already discussed with Mayor Paz and the sister, gipakita gyud sa ilaha kun giunsa niya pag-open para lang ma-ascertain. We already have witnesses further stating nga siya gyud si CJ Diaz”, butyag ni Police Brigadier General Debold Sinas, direktor sa Police Regional Office-7.
Giingong mao kini karon ang gikonsiderar nga lig-ong ebidensiya sa kapolisan batok kang Renato Llenes. Kahinumduman nga dihang gipresentar sa kapolisan ngadto sa media ang suspek gipadayag nga naghimo og tulo ka facebook account ang nipatay kang Silawan diin usa niini gihinganlan og CJ Diaz nga maoy nanguyab sa biktima online samtang ang duha nagpaila nga mga ate ni Diaz.
Matud ni Sinas nga lig-on ug makabarog ang ilang kaso batok kang Llenes kini bisan kong dili mopirma isip complainant ang ginikanan sa biktima. Apan giingong hanap pa nga ma-consolidate ang ilang kaso sa unang 17-anyos nga suspek nga gidakop sa National Bureau of Investigation-7 sanglit giingong wala sila’y ebidensiya batok niini.
Una nang gipadayag sa NBI-7 nga nagpositibo ang gipahigayong DNA test sa gituohang pat-ak sa dugo sa sinina sa menor ug sa DNA sa ginikanan sa biktima.
Sa habig sa polis, si Llenes ang ilang gituohang nakuha sa Close Circuit Television (CCTV) camera ug giangkon kini ni Llenes.
Si Llenes nibutyag nga gunting ang iyang gigamit sa pagdunggab sa lawas ug pagpanit sa nawong sa biktima ug gibuhat niya kini aron dili dayon kini mailhan. Sa kasamtangan, wala pa nigawas ang DNA test nga gipahigayon sa gunting ug sa DNA sample sa ginikanan ni Silawan. (BANAT NEWS)
- Latest
