Gidaghanon sa youth nga moanhi sa Sugbo sobra sa gilauman

CEBU, Philippines – Higpit na ang pagpangandam sa mga komitiba sa nagsingabot nga National Youth Day 2019 nga ipahigayon dinhi sa Dakbayan sa Sugbo karong Abril 23 hangtud 27.

Gipadayag sa mga tigpasiugda nga 10 mil ka batan-on ang moapil sa tigom apan sa ulahi ug pinal nga listahan niabot kini ngadto sa kapin sa 12 mil ka delegado ang moabot sa Dakbayan sa Sugbo.

Gumikan sa maong gidaghanon diin sobra kini sa gilauman hinungdan nga padayon gihapong nanawat ug pinansiyal nga ayuda ug tabang ang mga nagdumala sa NYD2019.

Matud ni Father Mark Barneso, steering team leader, mahinangpon  sila nga modawat gihapon og mga ayuda tungod kay aduna pa gihapon sila’y mga galastohan ilabi na nga nisobra ang gidaghanon sa mga batan-on nga niapil sa maong kalihukan.

Ang mga buot motabang mahimo kining modala sa ilang mga ayuda ngadto sa mga parokya nga gihimong festival site, sa Youth Center kilid sa Cebu Metropolitan Cathedral o ideretso kini ngadto kang Archbishop Jose Palma.

Mapasalamaton si Barneso ilabi na sa tanang mga nakatampo sa nagpadayon nga preparasyon sa NYD2019 ilabi na sa mga nagkdaiyang parokya ug mga kura. (/BDB)(BANAT NEWS)