Libreng sakay sa bus sa mga taga-Carcar, Dumanjug ug Oslob

CEBU, Philippines – Makaginhawa ang mga nagpuyo sa Carcar, Dumanjug ug Oslob nga nakabase sa siyudad sa Sugbo nga adunay planong mopauli sa ilahang lugar sa panahon sa Semana Santa.

Kini human si Jonathan Tumulak, operations manager sa Cebu South Bus Terminal, mianunsyo nga ang maong mga lungsod ug siyudad mipasalig nga kon magkuwang ang mga units sa maong terminal nga anaa sa siyudad sa Sugbo, pwedeng gamiton ang ilahang mga buses aron pagpasakay sa ilahang mga residente pauli sa ilahang tagsa-tagsa ka lugar.

“Pasiuna nga mga lungsod nga misaad pagpagamit sa ilang mga bus kon magnihit na ang mga bus sulod sa terminal atol sa tingsakay sa adlaw’ng Miyerkules Santo,” suwat niya sa iyahang Facebook account.

Iyang gipadayag nga ang maong mga lugar mao ang siyudad sa Carcar ug ang lungsod sa Dumanjug ug Oslob.

Apan, matud niya adunay hatagan og prayoridad sa pagpasakay sa mga pasahero sa nahisgutang mga lugar. Mao kini ang mga senior citizens, mga persons with disabilities, mga mabdos o inahan nga nagdala og masuso ug mga masakiton o mga bag-ohay lang naka-discharge sa ospital.

Si Tumulak midason nga ilahang gibanabana nga managhan ang pasahero nga manguliay sa ilang lungsod sa April 17.

Ang mga mosunod nga mga adlaw – April 18 (Maundy Thursday) ug April 19 (Holy Friday) – kay mga holidays o walay trabaho maong gipaabot nga daghang manguli alang sa long weekend.

Kahinumduman nga nagkuwang ang mga bus sa miaging tuig panahon sa Semana Santa ug gani ang mga lungsod sa lagyong lugar nipadala sa ilahang mga units aron magamit sa mga pasahero nga manguliay sa ilahang lugar.

Alang sa ilahang preparasyon, ang CSBT management mihangyo na sa mga lokal nga pangagamhanan nga mopahuwam sa ilahang mga bus aron pagdugang sa mga units nga anaa sa terminal sa higayon nga magkuwang kini.

Siya miseguro nga dili kini magamit sa pamulitika og sa pagpangampanya sa mga kandidato nga midagan alang sa umaabot nga Mayo 13 nga eleksyon.

Gipanghingusgan na usab sa terminal management ang ilahang preparasyon alang sa seguridad ug kaluwasan sa mga pasahero pinaagi sa pagpakig-alayon sa kapulisan alang niini. —/LPM (BANAT NEWS)