Albayalde ngadto sa mga militante: Kasohi mi

CEBU, Philippines – Gihagit ni Philippine National Police Director General Oscar Albayalde ang mga militanteng pundok sa pagpasaka og kaso batok sa iyang mga polis kun duna silay nakitang kalapasan sa operasyon nga gikamatay sa 14 ka mga gidudahang rebeldeng New Peoples Army nga gipangangkon sa mga walhong pundok nga mga mag-uuma didto sa Negros Oriental duha ka semana na ang nakalabay.

Si Albalyalde kinsa niduaw sa Bohol sa miaging adlaw nitug-an nga propaganda sa nagkadaiyang grupo kaning nagsige og saba-saba sa kadalanan. Matud niya, kun tinuod ilang pangangkon, mas maayong mopasaka sila og kaso batok sa kapulisan.

Iyahang giklaro nga giparelibohan niya sa pwesto ang mga polis nga nalambigit sa maong operasyon aron mahatagan og kagawasan ang mga imbestigador pag-imbestigar kun may lapso silang gihimo nga niresulta hinuon sa pagkapatay niadtong mga gidudahang NPAs.

Si Albayalde nagkanayon nga naglibog kini sa mga militanteng pundok kun para ba gyud sa kinabag-an ang ilang motibo. Giawhag ni Albayalde, ang mga nagkadaiyang grupo nga paaboton lang ang resulta sa imbestigasyon ug dili magsige og pakatap og mga bakak nga impormasyon diha sa social media. (/IBM)(BANAT NEWS)