Magpatabang sa “Oplan Baklas”

CEBU, Philippines – Ang Comelec Cebu City nagplano nga mo-require sa duha ka local parties, ang Bando Osmeña Pundok Kauswagan ug Partido Barug PDP-Laban nga mohatag og napulo ka tawo nga i-augment sa ilang kasamtangang man power alang sa ‘Oplan Baklas’ sa Siyudad sa Sugbo.

Si South District election officer Atty. Marchel Sarno miingon nga nagkinahanglan sila og dugang tawo alang sa pagtangtang sa illegal posters sanglit kuwang sila og personnel nga mohimo niini. Sigon ni Sarno nga bisan og ang ubang ahensiya sa gobiyerno mitabang nila, nagkinahanglan gihapon sila og dugang tawo alang niini.

Hinuon si Sarno mokonsulta kang North District election ffficer Atty. Chauncey Boholst kon dili ba makamugna og kasamok ang maong ideya.

Nasayran nga ang sunod nga pagpahigayon sa Oplan Baklas mahitabo sa dili pa ang pag-obserbar sa Semana Santa.

Kahinumduman nga atol sa unang hugna sa Oplan Baklas, miabot sa pito ka sakyanan ang gikargahan sa mga natangtang nga illegal campaign posters sa mga lokal nga kandidato.

Sagad sa mga kalapasan nga nahimo sa mga lokal nga kandidato mao ang oversized campaign posters ug ang mga gipapilit gawas sa common poster area. Hinungdan nga nanawagan si Sarno sa mga concerned citizens nga tabangan sila ug mihangyo sab kini sa mga kandidato nga dili mag-usik-usik og pundo ingon man ang kahago sa Comelec, PNP ug DPWH. (/DILT)(BANAT NEWS)