P8 million shabu, kagawad ug duha ka menor sikop

CEBU, Philippines — Dul-an sa P8 milyones nga ilegal nga drugas ang nasakmit sa managlahing operasyon nga gilusad sa kapolisan kontra ilegal nga drugas nga niresulta sa pagkasikop sa usa ka barangay kagawad, duha ka menor de edad ug laing unom ka tawo. Ang mga sakop sa Provincial Intelligence (PIB) sa Cebu Provincial Police Office (CPPO) mironda  sa Sitio Caduldulan, Barangay Lawaan 3 ug target ang panimay ni Bimbo Ramos, 36, pinasikad sa search warrant nga giluwatan ni Judge Leopoldo Cañete sa Regional Trial Court (RTC) Branch 60 sa lungsod sa Barili tungod sa ilegal nga drugas.

Si Sr. Insp. Alejandro Batobalonos sa PIB nagkanayon nga dunay impormasyon nga nalambigit sa ilegal nga drugas si Ramos kinsa kagawad sa maong barangay. Nasuta sab nila nga diha magpundohan ang mga drug personalities nga notado na sa kapolisan. Duha aka bulan nga gipanid-an si Ramos ug nasuta nga bagsakanan kini og drugas sa mga drug personalities sa maong dapit.

“Nahulog ni siya nga bodegero. Bagsakan adtong dako sad nga drug lord sa Lawaan III. Amo ni siya na-monitor and na positive mao giaplayan nato’g search warrant. Daghan didto ang di lagi motuo kay lagi daw buotan ni nga tawo,” sigon pa ni Batobalonos

Apan gihimakak ni Ramos ang pasangil nga nalambigit siya sa ilegal nga drugas. Matud niya ready to wear (RTW) ug tigtahi sila og mga jersey uniforms busa magsulod o gawas ang mga tawo sa ilang panimay. Nagtuo kining gisuyaan siya sa mga silingan ug nagtuo sab siyang politika ang hinungdan kay siya ray lahi og partido nga nilusot sa miaging piniliay.

Nakuha ang usa ka airgun rifle, CO2 gas tank ug lima ka dagkong pakete sa gidudahang shabu nga nitimbang 500 gramos nga kantidad P3.4 milyones.

Apan si Ramos niingon nga ‘planted’ ang maong ilegal nga drugas kay napkin sa iyang asawa ang lima ka puti nga butang nga nakit-an sa kapulisan.

Sa interview sa asawa niini nga si Rowena, mihimakak kini nga ilaha ang drugas. Miangkon hinuon siya nga ilaha ang air gun apan wala siya magtuo nga illegal diay.

Samtang si Kapitan Jimmy Bartele, nitug-an nga igo ra sila niabag sa kapolisan sa maong operasyon ug ang konsehal na maoy manubag sa kaso didto sa korte.

Matud niya, dugay na siyang nihangyo sa mga nalambigit sa illegal nga drugas nga moundang na  kay aduna gyuy panahon nga mangasikop sila.

13-anyos

Sa laing operasyon, usa ka 13 anyos ug walo ka mga gidudahang tiggamitan og drugas ang nadakpan gikan sa Sitio Mananga 1, Barangay Tabunok ug  Sitio Artville, Barangay San Isidro.Mga alas 3 sa kaadlawon kagahapon sa Tabunok, usa ka nagpakabanang tawo nitawag sa kapulisan ug nisumbong bahin sa mga ‘adik’ nga nag-estambay. Sa pag-adto sa mga polis ilang nasikop ang 13 anyos ug si Jerald Estillore, 18.

Samtang sa operasyon sa San Isidro, target sa kapolisan si Jonathan Pantonial nga usa ka drug den maintainer. Nasikop kini ug naatlan sa drug den ang iyang mga parokyano nga silang Nestor Cabusas, Roland Dapitin, Shalomar Campo, Justine Gelido, Jiber Cabusas ug si Miliam Labandero. Nakuha gikan kanila ang 10 ka paketeng gidudahang shabu.

Cebu City

Usa ka 16-anyos nga batan-ong lalaki ang gidakop human nakuhaag P4 milyones nga gidudahang shabu sa buy bust operation nga gihimo sa Police Regional Office -7 Drug Enforcement Group pinangulohan ni Police Lt. Col. Glenn Mayam diha sa San Vicente Ferrer, Barangay Duljo Fatima sa Dakbayan sa Sugbo. Matud pa ni Mayam ang maong binatilyo nitug-an nga gibilin lang kaniya sa usa ka Revin Berdon ang 600 gramos nga shabu kaniadto. Si Berdon nadakpan na niadto pang buwan sa Pebrero.

Sumala pa ni Mayam ilang dad-on sa DSWD ang binatilyo aron sila nay motan-aw kun angay kini kasohan.

Gibutyag ni Mayam nga ang binatilyo nitug-an nga wala niini ablihi ang gisudlan sa druga mao nga wala kini nasayod kun unsay sud.

Ang maong batan-on nailo na sa amahan ug giabandonar silang tulo ka managsuon sa ilahang inahan. (Mae Clydyl Avila ug Rowena Capistrano/IBM)(BANATNEWS)