Kapitolyo wala gihapoy napiling kontraktor
CEBU, Philippines — Sa ikatulong higayon wala gihapoy napili ang Kapitolyo nga kontraktor nga motukod sa four-storey parking building sulod diha sa Capitol compound.
Gibutyag ni Jone Siegfred Sepe, vice chairman sa Bids and Awards Committee (BAC) sa Kapitolyo nga nakapahigayon na sila og negotiated agreement unta niadtong niaging semana alang sa maong car park building apan wala gihapoy napilian.
“Walay ni-qualify kay ang mga offer nila is above the offer kay ilang reason sa mga bidder nisaka na ang presyo sa mga steel bar kay kasagaran puthaw imported man gud nato unya because of the inflation, the Train Law ug peso-dollar exchange na usab ang presyo they think dili siya duable at that ABC (approved budget for the contract)”, matud ni Sepe.
Ang ABC sa maong proyekto nikabat ngadto sa P91milyones.
Sa pagkakaron gibalik sa BAC ang mga dokumento ngadto sa engineering office aron ma-evaluate og balik ang proyekto ug makahimo og laing program of works aron usab makamugna og laing ABC.
Human niini ibalik na usab kini ngadto sa BAC aron nga maka-set og laing negotiated procurement.
Ang negotiated procurement usa kini ka proseso diin ang gobiyerno mamahimong makapahigayon og negotiated procurement ang usa ka LGU kon sa ikaduhang higayon adunay failure of bidding alang sa usa ka programa ug proyekto base kini sa Akta Republika 9184 kun “Procurement Law”.
Si Sepe nagkanayon nga wala hinuoy problema niini bisan panahon karon sa election sanglit sa balaod sa Comelec mamahimo ra ang usa ka LGU makapadayon sa bidding process sa mga proyekto niini dili lang mamahimo ang pag-award sa kontrata ngadto sa mapili nga kontraktor panahon sa election period. (/BDB)(BANATNEWS)
- Latest
