Negosyo gitan-aw sa pagpatay sa kagawad
CEBU, Philippines — Anggulo sa negosyo ang gitan-aw nga motibo sa pagbanhig patay kang barangay Ilaya kagawad Ramil Abueva niadtong Domingo sa buntag sumala pa sa kapolisan.
Si Police Colonel Manuel Javier Abrugena , direktor sa Cebu Provincial Police Office, nagkanayon nga sa pagkakaron anggulo sa away negosyo ang mas bug-at nga motibo sa pagpatay sa kagawad sanglit wala kini magpapili sa umaabot nga midterm elections karong Mayo.
Hinuon apil gihapon sa ilang subayon ang anggulo sa politika sanglit supporter kini sa mga Blanco.
“Pagkaaron nga validation and to determine kung ito ba ay maituturing na election related incident and tinitingnan din natin ‘yung anggulo sa business at sa personal niya,” si Abrugena miingon.
Matud pa nga kun mapamatud-ang may labot kini sa eleksyon ila ipasaka ngadto sa red category gikan sa orange category sa Election Watchlist Areas (EWAs) ang maong lungsod.
Ang hepe sa Ronda Police station nga si Police Captain Rodgene Fudotan nagkanayon nga nalambigit si Abueva og mga Small Town Lottery (STL) diin mibuwag na siya sa iyang financer ug usa kini karon sa ilang gitutokan.
Gisabotan kagahapon sa CPPO kun kinahanglang magtukod og Special Investigation Task Group ang kaso ni Abueva.
Si Abueva sakay sa iyang motorsiklo pauli gikan nanglawog sa iyang manok gibanhigan sa lalaking dalidali sab nga nisakay og puti nga van human sa pagpamusil. (/IBM)(BANATNEWS)
- Latest