Simultaneous Oplan Baklas himuon ugmang adlawa
CEBU, Philippines — Mopahigayon og lapad nga hiniusang pagpanangtang sa mga ilegal nga mga campaign posters ang Commission on Elections inabagan sa Intern-Agency Task Force ugmang adlawa.
Nanawagan karon ang Comelec og mga volunteers nga motabang pagpanangtang sa mga nagpasad nga mga campaign posters nga wala sa tukmang lugar ug naghinobra kadagko ang gidak-on. Katambayayong sa Comelec ang kapolisan isip security provider uban sa nagkalain-laing mga ahensya sa gobiyerno nga motabang sa Simultaneous Oplan Baklas.
Gitug-an ni Atty. Jerome Brillantes, Provincial Election Supervisor nga mas maayo unta kun ang mismong mga kandidato maoy mangunay pagtangtang sa ilang mga campaign posters nga gipamutang sa dili designated campaign poster area.
Kini aron ilang mapakita sa publiko nga sila sensiro ug patas nga nangampanya aron mabotaran sa katawhan.
Samtang gibutyag ni Brillantes nga wala sila mauwahi sa ilang preparasyon alang sa nagsingabot nga eleksyon.
Nagpadayon karon ang training sa mga molangkob sa board of canvassers isip refresher sa ilang gimbuhaton sa umaabot nga eleksyon.
Matud niya kun preparasyon ang hisgotan, anaa na sila sa 60 porsiyento sa kaandam ug mahimo kining 100 porsiyento sa higayon nga mahan-ay na nila ang tanan lakip na unya usab ang pag-abot sa mga galamiton alang sa eleksyon. (/IBM)(BANATNEWS)
- Latest
