Namaligya’g de-latang LPG gidakop

CEBU, Philippines — Tulo ka mga tawo ang nasikop sa kapulisan sa Dakbayan sa Sugbo, tungod sa pagpamaligya og ilegal nga butane canisters nga gisudlan og liquefied petroleum gas (LPG) nga peligro sa sunog ug kalapasan sa Presidential Decree 1856 o Illegal Trading of Petroleum Products.

Unang operasyon nahitabo sa may Warwick’s Barracks sa Carbon Public Market sa Barangay Ermita ning Dakbayan sa Sugbo kagahapon ug nasikop sila si Sheba Secuya, 33, taga Sitio Ermita Proper sa maong barangay ug Celso Tabay, 59, taga Dakbayan sa Talisay apan nagpuyo gihapon sa maong barangay.

Nasakmit gikan sa mga dinakpan ang dili momenos 70 ka mga butane canisters nga gituohang ang sulod LPG ug 800 kapin o kulang ka mga basiyo niini.

Ang mga dinakpan naaktohan nga namaligya niini atol sa gipahigayon nga operasyon sa mga sakop sa Police Station 5 nga gipangulohan ni Police Major Randy Caballes.

Ikaduhang operasyon nahitabo sa may Sitio San Roque -Banawa, Barangay Guadalupe diin nasikop si Christine Bacatan, 33, residente sa maong lugar.

Naaktohan siya sa mga tinugyanan sa Guadalupe Police Station pinangulohan ni Police Captain Dexter Basirgo ug mga sakop sa tracker team. Ang maong mga dinakpan pakyas sa pagpresentar sa mga dokumento sama sa certification to operate gikan sa buhatan sa Department of Energy nga nagpakitang otorisado silang mamaligya niini.

Ang butane canisters nga gisudlan og LPG gidili tungod kay mao kini ang sagad nga hinungdan sa mga dagkong sunog dinhi sa Sugbo. (/IBM)(BANATNEWS)