Sinulog beat gigamit sa jingle sa politiko

CEBU, Philippines – Usa ka kandidato pagkamayor sa Siyudad sa Naga ang migamit sa tugtog o beat sa Sinulog alang sa iyang jingle pagpangampanya.

Usa ka residenti sa maong dakbayan nga dili magpaila ang mipadala og bidyo sa Banat News diin madungog ang jingle diha mismo sa iyang panimay.

Ang tinubdan nagkanayon nga natingkag ang iyang dunggan sa dihang nadungog ang jingle ni kanhi bise mayor Delfin Señor nga magpapili pagka-mayor sa Naga nga migamit sa tugtog sa Sinulog.

Ang iyang apilyedo nasulod ra sab sa lyrics sa Sinulog apan ang nagpadala sa bidyo miingon nga daw bugal-bugal alang niya nga Katoliko ang gibuhat sa maong kandidato.

“Lain man gud kaayo paminawon ang tukar ba nga mura ba og gimenusan sa mga katoliko. Dili man ko relihiyoso gyud pero nasakitan ko kay daw yaga-yaga mani ilang gibuhat,” matud pa ni Jose (dili tinuod nga pangalan).

Samtang si Nena (dili sab tinuod nga pangalan) miingon nga sa una niyang dungog sa jingle daw mura’g wala ray problema apan sa kadugayan niya nga pagpaminaw nanlimbawot ang iyang mga balhibo isip usa ka Katoliko. Matag adlaw madungog ang maong tukar sa mga taga Naga.

Nasayran nga sa pagkakaron, walay guidelines ang Commission on Elections bahin sa paggamit og jingle mao nga dili nila mapitol ang mga kandidato sa ilang pagpublikar sa ilang mga pangalan gamit ang tukar. (/DILT)(BANAT NEWS)