Police visibility gihangyo nga palapdan

CEBU, Philippines —  Sa tinguha nga mapatuman ang  kahapsay ug kalinaw  niining  nagkaduol nga piniliay, gihimo karon sa kapolisan ang higpit nga pagbantay pinaagi sa gihingusgan nilang police visibility nga naglakip sa checkpoint ug pagpatrolya sa tanang dapit.

Sa Dakbayan sa Sugbo, gihulagway ni Konsehal Dave Tumulak, ang chairman sa Committee on Public Order and Safety ug Deputy Mayor for Police Matters nga alarming na ang nahitabong pagpanulis sa siyudad nga miresulta sa kamatayon sa mga biktima. Sama sa nahitabo sa usa ka tinun-an ug tindera sa usa ka bakeshop.

Gumikan sa maong hitabo nanawagan si Tumulak sa publiko nga mas magbinantayon sa palibot ug kon adunay makita o mabantayan nga kadudahang tawo, i-report dayon sa mga tinugyanan sa balaud.

“Atong gihangyo atong mga police, atong mga barangay tanods to be more vigilant lakip na sad atong katawhan nga magbantay sad gyud kay dili nani usual, this is unusual nga dunay pagpanulis nga pamatyon gyud ang mga bikitma…” matud ni Tumulak

Si Police Regional Office-7 regional director PBGen. Debold Sinas miawhag kang Cebu City Police Office director PSSupt. Royina Garma sa pag-revisit sa ilang visibility patrol niining pagsiaw sa tulis ug  kawat nga adunay gipamatay.

Sumala pa ni Sinas, kinahanglan tan-awon ug bantayan kining mga gagmay nga tulisan ug kawatan nga anaa karon sa gawas kinsa mangita og biktima aron makakwarta aron makagamit og drugas.

Dugang sa director nga kinahanglan tutokan sa kapolisan ang padulngan niining mga tulisan ug kawatan lakip usab ang ilang mga hide-out.

Subay niini ang Sogod Police Station ug Bogo City Police Station mihimo og  pagpang-apod-apud og informative materials nga naglakip sa mga flyers ug leaflets ngadto sa katawhan sa kabarangayan, merkado ug mga bus terminal ug uban pa.

Ang maong mga basahon nagpahimangno sa Community Anti-Terrorism Awareness,  Prohibited acts on the upcoming election,  RA 9995 Anti-Photo Video and Voyeurism Act ug  RA 9262 Anti-VAWC Act.

Ang paghimo sa maong kalihukan maoy ilang pamaagi sa pagpahimangno sa katawhan batok sa mga kalihukan sa dautang pundok nga makamugna og kadaut sa  ilang lungsod ug dakbayan. DILT (BANATNEWS)