Dili istrikto sa pagpasul-ob og helmet

CEBU, Philippines — Giangkon sa pangulo sa City of Talisay-Traffic Operation Development Authority (CT-TODA) nga dili sila istrikto sa mga nagmotorsiklo nga dili magsul-ob helmet.

Asoy pa ni Rogelio Villaver, pangu sa CT-TODA nga adunay mireklamo niini sa ilang buhatan ug iya kining gitubag nga aduna gyuy mga lugar sa Dakbayan sa Talisay nga walay dakop sa mga badlungong motorista kay wala man nila gibutangan og enforcer kay nagkuwang sila og sakop.

Nasayran nga sa pagkakaron, adunay 104 ka mga personnel ang CT-TODA apan kuwang ra gihapon kini suma pa ni Villaver. Mihatag na siya og suwat hangyo ngadto sa iyang mga labaw nga unta sila madungagan pa aron makatag gyud ang mga enforcer sa tanang karsada sa siyudad.

Sa kasamtangan, ang ilang gisiguro og bantay mao ang matag eskina sa Cebu South Coastal Road (CSCR) kay mao kini ang adunay daghang kusog nga managan nga mga sakyanan. Ang ilang pagsita sa wala magsul-ob og helmet anaa nila gipatuman sa CSCR diin kusog managan ang mga sakyanan dili sama sa ubang lugar sa Talisay nga dili ra kaayo delikado.

Si Villaver midugang nga sa CSCR daghan gyung mahitabo nga disgrasya diin daghan nasab ang namatay kon ikumpara sa ubang karsada sa maong dakbayan. (Gabriel C. Bonjoc/DILT)

Unom sikop sa  SEMPO sa kapolisan

Nasikop ang unom ka tawo sa managlahing Sychronized Enhanced  Management Police Operation (SEMPO) nga gihimo sa kapolisan sa Lungsod sa Cordova, San Remigio ug Sogod diin upat kanila ang nasakmitan og gidudahang shabu ug duha ang naaktuhan nga nagsugal og tong-it.

Si PSIns. Efren Diaz  Jr., hepe sa Cordova Police Station miila sa ilang nadakpan nga usa ka babaye nga gidudahang pusher og shabu nga si Beverly Fernandez, 47-anyos, lumad nga taga Guihulngan City, Negros Oriental apan kasamtangan nagpuyo sa Sitio Ponce 1, Brgy. Carreta sa Dakbayan sa Sugbo.

Ang suspek nadakpan human makadawat ang kapolisan og mga taho nga nagpahigayon kini sa iyang ilegal nga kalihukan sa Brgy. Poblacion hinungdan nga gihimuan nila og buybust operation diin ilang nasakmit ang 55 ka gagmayng pakete sa gituohang shabu ug ang P500 nga buybust money.

Sa Sitio San Jose, Brgy. Ibabao sa Lungsod sa Sogod, nadakpan ang giilang pusher nga si Leonardo Comajig, Jr. alyas Dondon, 27-anyos nga nasakmitan og lima ka gagmayng paketeng sa gituohang shabu ug P500 nga buybust money.

Sa mao gihapong dapit ang kapolisan sa Sogod nga gipangulohan ni PCIns. Harley Silay, midakop sa ilang naaktuhang nagdula og tong-it nga sila si Richard  Paquibot, 50-anyos ug Lorna Sogarol, 49-anyos. Nasakmit gikan kanila ang ang baraha og kuwarta nga ilang pusta nga mikantidad og P88.

Sa Brgy. Maño sa Lungsod sa San Remigio, nangulo sa buybust operation ang hepe sa kapolisan sa maong lungsod nga si PSIns. Elpidio Tagoan Jr., nga miresulta sa pagkasikop nila ni  Ervin Ursaiz, 35-anyos ug sa 17-anyos niini nga kauban. Nakuha gikan kanila ang P1,062 nga kantidad sa gituohang shabu. (/DILT)(BANATNEWS)