Graduating nga tinun-an gitulis gipatay

CEBU, Philippines —  Patay ang 21- anyos nga graduating student human kini gitulis ug gipatay sa riding-in-tandem nga tulisan diha sa dalan Tres de Abril, sa Barangay Labangon, Dakbayan sa Sugbo niadtong Biyernes sa gabii.

Ang biktima giila sa kapolisan nga si Jovanie Pat, graduating student karong Oktubre sa kursong BS-Elementary Education, ug nagpuyo sa Ibabao, Barangay Mambaling, Dakbayan sa Sugbo.

Sigun pa sa imbestigador sa kaso nga si Police Corporal John Erik Samosa, alas 10 sa gabii naglakaw ang biktima kauban ang usa ka church mate nga si Qunie Ruth Antivo sa maong dalan.

Gikan ang duha sa ilang simbahan diha sa dalan Katipunan ug naglakaw silang duha aron unta ihatod ni Pat si Antivo nga nagpuyo duol nahitaboan.

Matud sa imbestigador gihunongan ang duha og usa ka motor nga dunay duha ka mga sakay ug gilabni ang ilang mga bag.

"Sa statement sa kauban (Antivo) wala man kuno ni (Pat) misukol, paglabni gipusil dayon," sigun sa maong imbestigador.

Ang Police Mobile Patrol Group (MPG) 04 maoy nakaresponde sa maong alarma ug gidala  si Pat sa Adventist Hospital-Cebu, apan gideklarar kini didto nga dead on arrival.

Niining pagsuwat, wala pa mailhi ang mga suspek sa krimen sanglit giingong nagtaptap sa ilang mga nawong ang mga mamumuno.

Hanap sab ang kuha sa Closed Circuit Television sa maong lugar maong wala matino bisan ang klase sa motor nga gigamit sa mga tulisan.

Ang hepe sa Labangon Police Station nga si Police Major Keith Allen Andaya miingon sa Banat News nga posibleng ang mga tulisan mao usab ang nitulis sa 37 anyos nga call center agent nga si Loraine Temple.

Kahinumduman nga naglakaw ra sa eskina sa Pope John Paul Avenue  sa Barangay Mabolo niadtong Oktubre 4, 2018 si Temple dihang gilabnihan siya sa iyang bag ug gidiretso dayon og  pusil sa wala pa mailhing suspetsado nga nagsakay sab og motorsiklo.

Matud sab niya, tungod sa nahitabo pabutangan na og polis ang maong lugar ilabi na kun gabii.

Matud pa ni Gorjane Pat, maguwang sa biktima, ikawalo sa ilang 12 ka managsuon ang namatay. Pangandoy unta niining matabangan ang pamilya kun makahuman sa pagtungha.  IBM (BANATNEWS)