Unom ka drayber positibo sa drug test
CEBU, Philippines – Gatusan ka drayber ang gipaubos sa kinalit nga drug test sa Philippine Drug Enforcement Agency (PDEA)-7 kagahapon kini subay sa programa nga “Oplan Harabas”.
Kagahapon sa hapon unom ka drayber ang giingong nagpositibo sa maong drug test apan ipaubos pa kini sa confirmatory matud sa direktor sa Philippine Drug Enforcement Agency (PDEA)-7 Wardley Getalla.
Tumong niini mao ang pagsiguro nga walay mga drayber nga magbiyahian nga tiggamitan og ginadili nga drugas. Ang mga drayber nga gipaubos sa drug test gilangkuban sa mga drayber sa van diha sa temporaryong terminal sa Kamagayan, North Bus Terminal ug mga drayber sa Public Utility Jeep (PUJ) sa Ayala.
Kauban sa PDEA-7 ang mga sakop sa Land Transportation Office (LTO), Land Transportation Franchising and Regulatory Board (LTFRB) ug kapolisan.
Matud ni Getalla nga ang pagpahigayon nila sa Oplan Harabas dungan kini sa kalihukan sa PDEA tibuok nasud aron sa pagsiguro nga walay mga drayber nga tiggamitan og ilegal nga drugas.
Si Getalla nagkanayon nga sa maong kalihukan gisiguro nila ang seguridad sa mga pasahero pinaagi sa pag-monitor sa mga drayber.
Samtang ang acting chief operations division sa Land Transportation Office (LTO)-7 Macario Getaruelas nagkanayon nga ang drayber nga magpositibo sa drug test pwede kining mapriso tungod kay nakalapas kini sa Akta Republika 10586 kun “Anti-Drunk and Drugs Act of 2013”.
Ang drayber nga magpositibo pasakaan kini og kaso sa nahimo niyang kalapasan ug kong makonbikto kini i-revoke ang lisensiya niini sa tibuok kinabuhi. (/BDB)(BANAT NEWS)
- Latest
