Mga kandidato sa Talisay mituyok sa dakbayan

CEBU, Philippines – Sama sa ubang mga lugar, alegre na sab ang Dakbayan sa Talisay sa unang adlaw sa campaign period.

Ang grupong Alayon gisugdan ang ilang kalihukan og santos nga misa sa Santo Niño de Cebu Parish sa Barangay Mohon mga alas otso sa buntag kagahapon.

Samtang ang grupo ni kanhi bise mayor Romeo Villarante kinsa magpapili sa susamang posisyon, mitambong og misa nga gipahigayon sa simbahan sa Santa Teresa de Avila sa Barangay Poblacion. Ang grupo ni kanhi mayor Johnny V. de los Reyes, wala mahibaw-i kon unsa ang ilang mga kalihukan.

Nabantayan sab nga daghan na ang dagway sa mga kandidato nga gipamilit apan mingaw pa ang sa grupo ni JVR kinsa magpapili pagkamayor sa siyudad.

Mipahigayon og caravan ang Alayon nga gipangulohan ni kongresista Gerald Anthony “Samsam” Gullas kinsa magpapili pagka-mayor.

Nanukad kini sa hawanan sa Talisay City Central School, mipaingon sa Brgy. Poblacion ug mituyok sa tanang dapit sa maong dakbayan. Pagkagabii, mihimo sila sa ilang unang rally sa gym sa Barangay Lagtang.

Samtang ang grupo ni Villarante, pagkahuman sa misa, nakiglamano kini sa mga tawo palibot sa Brgy. Poblacion kon asa siya nagpuyo.  Si Villarante walay pares nga mayor apan aduna kini mga kauban nga gustong magpapili sa pagka-konsehal sa siyudad. (/DILT)(BANAT NEWS)