Shootout sa buy-bust, mag-live in patay
CEBU, Philippines – Managkapuyo nga gipasanginlang tigpayuhot og ilegal nga drugas diha sa Sitio Mananga 2, Barangay Tabunok, Dakbayan sa Talisay napatay sa kapolisan kagahapon sa hapon.
Ang mga namatay mao sila si Alex Dimaalip Cuyogan, 35, ug iyang kapuyo nga si Johanna Mae Dilar, 37. Samtang samdan sila si Resty Abellana, 24, ug ang usa ka nailhan lang sa pangalang Jaylord.
Si Sr. Insp. Alejandro Batobalonos, pangu sa Provincial Intelligence Branch (PIB) nagkanayon nga subject sa ilang operasyon si Cuyogan apan nikuyog ang kapuyo niini ug si Jaylord atol sa transaksyon duol sa sapa.
Apan nakabantay si Cuyogan nga polis ang ilang gikasabot hinungdan nga nibunot kini sa armas dayon pabuto. Nakabawos ang mga polis hangtud nga naigo ang paa ni Cuyogan apan nakadagan kini sa kabalayan ug nakatago sa balay ni Abellana.
Matud pa ni Batobalonos nakig-negosasyon unta sila sa mga suspek nga motahan na lang hangtud nga si Dilar giingong niabli sa pultahan kay motahan unta.
Apan si Cuyogan gikatahong kalit nga nipabuto sa iyang armas hinungdan nga gibakbakan kini sa mga polis diha sulod sa panimay apil iyang kapuyo ug si Abellana.
Patay dayon si Cuyogan samtang gidala sa tambalanan si Dilar ug Abellana. Apan si Dilar gideklarar nga patay na samtang si Abellana gibalhin sa tambalanan sa Siyudad sa Sugbu. Una niini, nagtuo sila nga napagan lang si Abellana apan sa pakisusi sa kapulisan mao gyud diay kini ang niabli sa pultahan aron makatago silang Cuyogan. Tungod niini, plano sa kapolisan nga apilon sa pasakaan og kaso si Abellana.
Nakuha gikan sa mga suspek ang upat ka dagko nga pakete sa shabu nitimbang og 400 gramos nga adunay kantidad nga P2.7 milyones, ug ang kalibre .45 nga armas diha sa gihagbaan ni Cuyogan. (/IBM)(BANAT NEWS)
- Latest
