Tulisan patay sa off-duty nga polis

CEBU, Philippines – Lalaking gipasanginlang tulisan patay human nakigpinusilay sa off-duty nga polis nga pasahero sa jeep de pasaheroan nga iyang gitulis diha sa  eskina Magallanes ug dalan El Filibusterismo, Barangay Ermita sa Dakbayan sa Sugbo niadtong Domingo sa gabii.

Ang napusilan patay giila sa Cebu City Police Office nga si Hygie Mendez Mambiar, 30, taga Sitio Tabay-Lawom, Barangay Tisa, Dakbayan sa Sugbo.

Ang jeep nga giingong iyang gitulis may rotang 04I nga moagi sa Carbon Public Market paingon sa Plaza Housing sa Barangay Busay.

Sumala pa sa hepe sa Carbon Police Station nga si Police Chief Inspector Ryan Caballes, mideklarar og hold up sulod sa jeep ang suspek ug giingong nanion og mga pasahero ginamit sa iyang paltik nga kalibre .9mm nga armas.

Nakuha niini ang duha ka mga cellphone sa duha ka pasahero. Apan wala masayod ang suspek nga ang pasahero sa front seat tupad sa drayber mao si Police Officer 3 Nemesio Dinopol, homicide investigator sa Pari-an Police Station.

Giingong nagpailang polis si Dinopol apan wala mopatuo si Mambiar ug gitiunan pa niini ang polis hinungdan nga giunhan na lang siya ni Dinopol ginamit sa iyang Glock .9mm.

Samaran, dali-dali nga mikanaog sa jeep ang suspek apan gibana-banang 50 ka metros gikan sa iyang pagkanaog nahagba kini ug namatay.

Na-recover sa mga imbestigador ang mga kinawat nga cellphone ingun man ang armas sa suspek ug upat ka mga basiyo sa kalibre .9mm.

Gideklarang dead on the spot sa mga sakop sa Emergency Medical Services si Mambiar.

“Akyat bahay ug tulis pud ang modus ani,” sigun sa maong hepe.

Si Police Senior Superintendent Royina Garma, direktor sa CCPO mimando sa Carbon Police Station nga ipasubay ang mga kaso sa pagpanulis sa maong dapit aron imbitahon kadtong mga nabiktima ug ipatan-aw kun si Mambiar ba ang nagtulis kanila.

Gibutyag usab ni Caballes nga paryente si Mambiar ug ang suspek sa pagtulis ug pagpatay sa DJ jockey ug kanhi Miss Kapisanan ng mga Broadcaster ng Pilipinas (KBP) nga si Marie Alexi Bolongaita sud sa balay sa dalaga sa Busay Villas, Sitio Plaza Ville sa Barangay Busay ning dakbayan niadtong Septiyembre 21, 2018.

Ug ang natumbok nga suspek mao si Renante Mambiar Mendador, 36, nga nadakpan sud sa tambalanan tungod sa naangkon nga mga samad tinigbasan nga giingong resulta sa pagsukol ni Bolongaita kaniya.

Si Garma miingon nga maayo ang gibuhat ni Dinopol ug buot niya kining pasidunggan.

“Alam mo kung pulis ka kasi anytime pulis ka pa rin kahit di mo na duty. By the end of the day,  ‘yung instinct mo pag nanduon ka na, pwede man siya di mag-respond kung gusto niya pero dahil isa siyang polis, nandun pa rin yung responsibility at obligasyon niya na protektahan ang mga tao,” si Garma nagkanayon. (Rowena Capistrano/IBM)(BANAT NEWS)