Bong Go: Termino sa barangay officials angay lugwayan
CEBU, Philippines — Kasamtangang termino sa mga barangay officials kuwang aron epektibo nilang maserbisyohan ang ilang kabarangay sumala pa ni kanhi special assistant to the president ug senatorial candidate Christopher ‘Bong’ Go.
Si Go nipadayag sa usa ka interbyu human sa iyang pagbisita sa miaging gabii sa mga molupyo sa 6.5 relocation site sa Barangay Paknaan sa Dakbayan sa Mandaue .
Kauban ni Go si Mandaue City Mayor Luigi Quisumbing, ug mga opisyales sa maong barangay ingon man ang mga aktor nga silang Philip Salvador ug Robin Padilla nga nakapahugyaw sa mga tawong nanambong.
Sayo niana, usa ka motorkada ang gihimo sa Dakbayan sa Lapu-Lapu ug sa Mandaue City nga gikuyogan sa mga grupo sa mga motorista.
Nahimo sab siyang guest speaker sa graduation rites sa Indian Aerospace University ug didto iyang giawhag ang mga estudyante nga suportahan ang pangulo sa kampanya niini batok ilegal nga drugas ug kurapsyon.
Matud niya, mubo ra kaayo ang tulo ka tuig nga termino sa mga barangay officials aron ilang mahatag ang ilang mga gipanaad sa kampanya ngadto sa ilang mga konstituwente.
Sagad sa mga barangay officials adunay mga plano ug mga programa lakip na nga proyekto para sa ilang dapit, apan gumikan sa kalangay sa pagpagawas sa pundo gikan sa taas daghang proyekto ang di matiwas ug usahay wala gyud masugdi paghimo.
Gusto karon ni Go nga iduso ang pagdugang og laing duha ka tuig sa kasamtangang tulo ka tuig nga termino sa barangay officials aron duna gyud silang mahimo ug dunay makita ang katawhan kanila.
Si Go kinsa nidagan sa pagka-senador ubos sa partido ni Presidente Duterte nga PDP-Laban nagkanayon nga kun mahatagan sila og higayon sa katawhan, usa sa iyang tutokan ang mga programa nga ang mga kabus nga pamilya makabaton og kaugalingong pinuy-anan.
Iyaha sab pangusgan ang mga gisugdan niya nga programa sa panglawas, edukasyon, sports , sector sa mga maguuma ug mananagat ug uban pa.
Giawhag niya ang katawhan nga padayong suportahan ang mga programa ug kampanya ni Duterte batok ilegal nga drugas ug kurapsyon sa gobiyerno. (/IBM)(BANATNEWS)
- Latest