Suspek pagpatay kang silawan gipabuhian

CEBU, Philippines — Gipaboran sa prosekyutor ang gisumiter nga mosyon sa kampo sa 17-anyos nga gipasanginlang mipatay kang Christine Lee Silawan sanglit giingong illegal ang pag-aresto kaniya sa mga operatiba sa National Bureau of Investigation-7.

Nahitabo kini dungan sab sa paglubong kang Christine sa kapahulayang dayon kagahapon didto sa Dakbayan sa Lapu-Lapu diin emosyonal kaayo ang gatosan ka mga tawong nihatud kaniya sa sam-ang. Si Attorney Vincent Isles, abogado sa suspek kusganong miinsister nga illegal ang pagdakop sa maong bata sanglit walay arrest warrant.

Mamahimo rang madakpan ang suspek bisan pa man og walay warrant of arrest kun: in flagrante delicto o caught in the act kini; nadakpan sa hot pursuit; ug kun kini pugante.

Sa kaso sa maong batan-on, base sa resolusyon walay nasakar sa tulo. Wala naaktohi ang maong batan-on paghimo sa krimen ug nilanat pa og unom ka adlaw gikan sa adlaw nga gituohang gipatay si Silawan ayha pa siya gidakop.

"Ato i- clarify, the release of my client has nothing to do with strength or weakness of the evidences of either parties, ang ato lang is the arrest was illegal," si Isles nagkanayon.

Hinuon, wala pay desisyon ang kampo sa suspek kun mopasaka ba sab sila og reklamo batok sa NBI sa nabuhat niini nga illegal nga pagdakop.

"Masabtan man pud gud kun nganong nagdali-dali sila, they want to solve, they have pressure from the higher ups and also from the public," si Isles nagkanayon.

Butyag ni Isles nga nakuha na nila ang maong bata ug gibutang nila kini sa usa ka safe house. "We assumed (nga naay threat) and I advised him, ma-security conscious baya ta kay we know it's a sensitive case," si Isles miingon.

Giingong daw naibtan og tunok ang ginikanan sa suspek sanglit giingong samtang anaa kini sa City Social Welfare and Development (CSWD) sa Dakbayan sa Lapu-Lapu daw gitratar kini sama og piniriso.

Nasayran nga gidakop sa NBI-7 ang 17 anyos nga batan-on nga gituohang ex-boyfriend ni Silawan human kini natumbok pinaagi sa CCTV nga siya maoy katapusang nakauban sa biktima nga naglakaw gikan sa Sacred Heart of Jesus Parish, paingon sa bakanteng luna sa Sitio Bankal, Barangay Pajac, Lapu-Lapu City niadtong Marso 10 sa gabii, adlaw’ng Domingo.

Pagkasunod adlaw, Marso 11 napalgan na lang nga patay ug gipanitan ang nawong sa biktima.

Sa wala pa gilubong si Silawan, usa ka Requiem Mass ang gihimo diha sa Santo Niño de  Mactan  Parish  sa  Barangay  Mactan ug gihatud kini ngadto sa Cattleya  Memorial  Park   sa  Lungsod  sa  Cordova.

Miduyog sa paghatud kaniya si Mayor Paz Radaza ug ubang opisyales sa siyudad lakip na ang mga tinun-an ug kahigalaan ni Christine. Silang tanan nangita og hustisya para sa dalagita.

Ang inahan ni Silawan na si Lourdes tungod sa tumang kaguol nakuyapan ug gitabang sa medical team. (Rowena Capistrano ug Romeo Limpangog/IBM)(BANATNEWS)