‘Escort’ sa politiko nakuhaan og armas

CEBU, Philippines — Nag-atubang karon og kaso ang usa ka tawo kinsa nagpailang escort sa usa ka politiko nga mitambong niadtong Huwebes sa political rally sa Hugbong ng Pagbabago (HNP) sa Dakbayan sa Mandaue human kini masakpi nga nagdala-dala og armas.

Si SPO3 Renato Canja sa Presinto 1 sa Mandaue City Police Office (MCPO) miila sa ilang dinakpan nga si  Nelson Encabo Lim, 35-anyos, taga Sitio Cabag-o, Brgy. Cogon sa Dakbayan sa Naga.

Duha ka kaso ang atubangon ni Lim nga naglakip sa kalapasan sa  R.A. 10591 o “Comprehensive Firearms and Ammunition Regulation Act” ug Commission on Elections (Comelec) gun ban.

Matud pa ni SPO3 Canja nga si Lim nasakmitan og kalibre 45 nga armas ug wala kini makapakita og mga dokumento nga legal ang paghupot niini.

Gitataw sa polis nga higpit ang pagbantay sa entrada sa Mandaue City Sports and Cultural Complex nga nahimutang sa Brgy. Centro sa maong dakbayan ug dihang misulod ang dinakpan nga nagsul-ob og itom nga jacket ug nagsambilay og sling bag nga maoy gisudlan sa iyang armas.

Lakip nga nakuha gikan ni Lim, ang magazine nga adunay pito ka bala ug I.D. nga nag-ingong sakop kini sa R7 Unified  Marshall.

Giingong nangatarungan ang dinakpan nga apil kini sa escort sa mga politiko nga mitambong sa HNP rally apan wala kini makatug-an kon si kinsa nga politiko ang iyang gibantayan. (/DILT)(BANATNEWS)