Motor mibangga sa bus, 2 patay
CEBU, Philippines – Duha ang nakabsan sa kinabuhi dihang ang ilang motorsiklo nga gisakyan mibangga sa usa ka Ceres bus kagahapon sa buntag didto sa national road sa Barangay Canamocan, lungsod sa Compostela.
Ang nakalas naila nga sila si John Gitgano, 17-anyos, kinsa maoy drayber sa motor ug angkas niini nga si Christian Gorre, 20-anyos. Ang duha pulos residente sa maong lugar.
Si Senior Police Officer 1 Arthur Ariate,sa Compostela Traffic Enforcement Team, midetalye nga base sa ilang imbestigasyon ug kuha sa dash cam sa gimaneho ni Rolando Morre, 46 anyos, taga Compostela ug driver sa Ceres bus, nagbiyahe kini padulong sa norte samtang ang mga biktima padulong sa habagatan nga bahin.
Si Morre miingon nga dihang miabot siya sa maong dapit, kalit mi-overtake ang motor sa laing sakyanan rason nga napunggit kini sa bus.
Kusog nga impact sa maong panagbangga diin ang duha ka mga biktima nalamba uban sa giluwanan nilang motorsiklo ngadto sa sementadong karsada nga nakaingon sa grabe nilang pagkaangol.
Dali untang gidala ang mga biktima ngadto sa Danao Provincial Hospital apan ang mga doktor sa maong tambalanan ang mideklarar kanila nga ‘dead on arrival’.
Gidugang ni Ariate nga mitahan ngadto sa ilang buhatan ang drayber sa Ceres bus ug kasamtangan kini karon nilang gitanggong sa sulod sa ilang detention samtang giandam na nila ang tukmang lakang nga pagahimoon batok niini. — Rowena D. Capistrano/LPM (BANAT NEWS)
- Latest