Bagyong Chedeng magdala og ulan

CEBU, Philippines — Makasinati ang kabugnaw sa panahon ang Sugbo human sa pipila ka mga adlaw nga hilabihan nga kainit tungod sa pagsulod sa Tropical Depression Chedeng nga mosulod sa Philippine Area of Responsibility  (PAR) dinhi sa nasud  nga giingong magdala usab og kusog nga ulan.

Si Engineer Alfredo Quiblat, pangulo sa Pagasa Visayas Office sa iyang pamahayag miingon nga si Chedeng  ang mosulod dinhi sa nasud ug may posibilidad nga  motadlas sa Visayas ug Mindanao.

Magdala kini og ulan sa habagatang bahin sa Visayas ug sa Mindanao. Matud pa ni Quiblat kun makasulod na kini sa Visayas masinati ang pagbunok sa ulan sa pipila ka mga dapit nga naglakip na niini dinhi sa Sugbo.

Ang pagbunok sa uwan makatabang sa pagdugang sa nagnihit karon nga supply sa tubig dinhi sa Sugbo ilabi na sa mga fishponds nga naghinayhinay na sa paghubas tungod sa nasinati nga kainit.

Gipahimangnoan ang gagmay nga mga sakyanan sa kadagatan nga maglikay sa pagpalawod ilabi na gayud sa panahon sa kahaponon sanglit masinati man ang mga pag-unos nga makaingon sa pagdagko usab sa balud sa kadagatan.

Giawhag sa Pagasa ang publiko ug ang Disaster Risk Reduction and Management Offices in the Visayas ug Mindanao sa padayon nga pag- monitor  sa kalamboan sa tropical depression ug ingon himoon usab ang pagpangandam alang sa mahitabo nga pagbaha ug ingon man ang pagdahili sa yuta.

Ang Tropical Depression Chedeng  nga nagpadayon sa iyang pag-irog sa gikusgon nga  25 kilometero sa matag oras ug nasigpatan kini sa gilay-on nga 980 ka kilometro sa kasadpang silingang bahin sa  Mindanao. (BANAT NEWS)