Killer ni Christine Lee Silawan menor de edad
CEBU, Philippines — Suspek nga giingong maoy nagpatay sa 16 anyos nga dalagita sa Lapu-Lapu City usa sab ka menor de edad nga giingong kanhi uyab sa biktima, nadakpan sa mga sakop sa National Bureau of Investigation-7 niadto pang Sabado sa gabii didto sa Barangay Maribago sa maong dakbayan.
Ang suspek nga giingong 17-anyos maoy gitumbok sa pagpatay kang Christine Lee Silawan.
Si Atty. Antonio Pagatpat, Deputy Director for Regional Office sa NBI nikonpirmar nga ang NBI 7 Central Visayas nikustodiya sa primary suspect sa kinsa giingon nga ex-boyfriend sa gipatay.
Ang maong minor de edad nasikop atol sa operasyon sa NBI- 7 diha sa Barangay Maribago sa maong dakbayan.
Samtang si Atty. Tomas Enrile, Director sa NBI 7, nibutyag nga base sa kuha sa CCTV camera, ang maong 17anyos nga batan-on lalaki maoy kataposang nakit-an nga kuyog ni Silawan sa usa ka subdivision sa Maribago.
Matud pa nga miangkon ang maong minor de edad sa NBI nga sobrang selos maoy hinungdan sa nahimo niini ang krimen.
Padayon karon ang NBI sa pagpangita sa laing mga kauban niini nga naghimo sa krimen. Kahinumdoman nga adunay mga nakasaksi nga nag-ingong tulo ka tawo ang nihimo sa krimen.
Ang inahan ni Christine nga si Lourdes, nibutyag bisan ug nahupay siya gamay sa pagkasikop sa usa sa mga suspek sa kamatayon sa iyang anak, apan buot niyang masikop gyud ang tanang nanamastamas sa iyang anak.
Sumala pa ni Lourdes, niadtong Domingo sa gabii gipresentar sa ilaha ang suspetsado. Si Lourdes miingon nga iyaha nang gitugyan sa otoridad ug sa korte ang pagkab-ot nila sa hustisya.
Kahinumdoman nga si Lourdes daan nga namahayag nga di siya kombinsido sa dihang usa ka Jonas Bueno nga suspek sab sa pagpatay didto sa Danao City niadtong Enero 11 ning tuiga maoy nagpatay sa iyang anak.
Si Bueno kinsa person of interest sa Police Regional Office-7 nadakpan sa NBI-11 didto sa Davao City tungod sa warrant of arrest pagpatay sa maguuma didto sa Danao City.
Si Senior Superintendent Lemuel Obon, direktor sa Lapu-Lapu City Police Office (LLCPO) miingon nga dako gyud kaayo og kapuslanan ang paginstalar og mga CCTV cameras kay makatabang kini sa pagsulbad sa krimen. (BANAT NEWS)
- Latest