Bangga duha ka motor usa patay

CEBU, Philippines — Usa ang patay ug duha ang angol sa disgrasya sa kadalanan sa may Sitio Candabong, Barangay Binlod, Argao kagahapon sa kaadlawon. Ang nakalas naila nga si John Sedfrick Delos Reyes, 17, taga Barangay Jampang nga nagmaneho og motorsiklo nga skeleton.

Samtang naangol ang iyang angkas nga si Christopher Kyle Mancao, 21, u gang drayber sa nakabangga nilang motor nga si Jollemar Dayondon, 26, taga Barangay Binlod sa maong lungsod. Matud pa ni Police Officer 3 Howard Mynopas, Desk Officer sa Argao Police Station, base sa inisyal nga imbestigasyon ang duha ka mga motor pareho og direksyon dihang nagkasingkiay sila og nangatumba sa dalan.

Si Dayondon gikan sa usa ka resort sa Poblacion, Argao, samtang si Delos Reyes gikan sa Barangay Jampong. Ang mga biktima dali nga gidala sa tambalanan, apan gideklarar nga patay nang naabot si Delos Reyes, samtang ang ubang biktima gibalhin sa tambalanan sa Dakbayan sa Sugbo.

Padayon pa karon nihimo ug imbestigasyon ang kapulisan may kalabutan sa maong insidente. (/IBM)(BANATNEWS)