Napatay human nisukol sa polis

CEBU, Philippines – Patay ang usa ka durugista human nisukol sa mga polis atol sa buy-bust operation diha sa Sitio Hawod, Barangay Bulacao, Dakbayan sa Talisay niadtong Miyerkules sa hapon.

Ang namatay mao si Rene Mañosa alyas “Tambok” taga Villa Bulsita, Barangay Bulacao, Siyudad sa Sugbo.

Sa inisyal nga imbistigasyon nasuta nga ang kapolisan sa Lungsod sa San Fernando maoy nag-una sa maong operasyon.

Kini human aduna sila’y nasikop sa ilang hurisdiksiyon nga giingong nitug-an nga source nila sa ilegal nga drugas si Mañosa.

Gihimo ang operasyon sa maong lugar apan dihang nakabantay ang suspek nga polis ang iyang gikasabot nibunot kini sa iyang armas ug nipabuto ngadto sa operatiba.

Maayo nalang gani kay wala makaigo ang suspek sa kapolisan ug napatay kini human nibawos ang mga polis.

Giingong nakuha gikan sa suspek ang usa ka revolver nga adunay duha ka buhing bala ug usa ka kabhang sa cylinder niini.

Ug giingong nakuha usab ang usa ka medium nga pakete ug 20 ka gagmay’ng pakete nga shabu gikan sa suspek. (/BDB)(BANAT NEWS)