Granada, armas ug shabu sakmit
CEBU, Philippines — Nasakmit sa kapolisan ang granada, armas ug shabu atol sa managlahing buybust operation ug checkpoint nga gihimo sa kapolisan sa Liloan, Dakbayan sa Lapu-Lapu ug Mandaue.
Sa Brgy. San Vicente sa Lungsod sa Liloan mihimo og buybust operation ang kapolisan diin ilang nadakpan sila si Joper Anatado ug Janina Bohol.
Nasakmit gikan sa duha ang granada, armas ug unom ka gramo nga gituohang shabu nga nagkantidad og P40, 800.00 basi sa Dangerous Drug Board. Nasikop sa mga sakop sa Compostela Police Station pasado alas 10 sa miaging gabii sa Sitio Guitar, Brgy. Poblacion sila si Paulino Condisar nga taga Brgy. Tag-ubi. Nagdala kini og bagpack samtang nagsakay sa iyang motorsiklo hinungdan nga kining gipahunong ug dihang gisusi sa kapolisan, nasuta nga kalibre 38.nga pistol nga puno og bala. Laing nadakpan tungod sa paghupot og armas mao si Peter Paul Toledo nga taga Brgy. Looc, Dakbayan sa Danao. Siya gidakop mga sakop sa Presinto 1 sa Mandaue City Office. Nakuhaan kini og kalibre 38 nga pistola. Nadakpan usab sa checkpoint sa kapolisan sa Siyudad sa Lapu-Lapu sila si Rafael Sabate, Andree Avila kinsa nakuhaan og usa ka medium size nga putos sa gituohang shabu.
Laing nasikop mao sila si Justine Limpangog ug Jervey Valenciano Berdin, mga trabahante sa MEPZA. Nakuhaan sila og 11 ka gagmayng pakete ug usa ka dakong pakete sa gituohang shabu atol sa buybust operation.
Sa Siyudad sa Talisay, upat ka tawo nga nagbitbit og ilegal nga drugas ang sunod-sunod nga nasikop sa mga sakop sa Regional Mobile Force Batallion (RMFB-7) sa Brgy. Tanke.
Ang mga nasikop mao sila si Hacor Cabactulan, kinsa nakuhaan og unom ka gagmayng pakete sa gituohang shabu. Sunod nga nadakpan mao si Felix Mangaron kinsa nasakmitan og duha ka gagmayng putos sa gituohang shabu.
Samtang si Arneil Ocampo nga taga Brgy. Inayawan, Cebu City nakuhaan og upat ka gagmayng pakete sa giduhanga shabu. U gang katapusang nasikop mao si Jeff MC Claire de Villa nga taga Brgy. Cansojong ug nakuhaan sab siya og tulo ka gagmayng pakete sa gituohang shabu.Nagtingkagol sab sa lock-up jail sa Labangon Police Station si Ryan Atillano human kini masikop sa kapolisan sa may A. Lopez, Brgy. Calamba, Dakbayan sa Sugbo.
Nasakmitan kini og mga pinutos nga gituohang shabu nga mobalor og dul-an P106 mil basi sa Danerous Drug Board Value. Natigayon ang maong operation human gisumbong kini sa programang “Itug-an ni CD”. (BANAT NEWS)
- Latest
