Mangangayo og relo, mekaniko gipatay sa riding-in-tandem

CEBU, Philippines — Duha ang patay sa managlahing hitabo sa pagpamusil sa Dakbayan sa Lapu-Lapu ug Mandaue niadtong Sabado sa hapon diin ang namusil giingong riding-in-tandem.

Sa Lapu-Lapu City, patay ang mangangayo og relo sa merkado publiko sa Brgy. Poblacion dihang gipusil kini sa duha ka wala mailhing mga lalaki pasado alas singko sa hapon niadtong Sabado.

Si   Police  Technical Sergeant   Lydo  Pinus sa Homicide Section sa Lapu-Lapu City  Police Office miila sa biktima nga si Christopher Aying Agosto, 39- anyos taga Sitio Abuno,  Brgy. Pajac.

Giingong na-busy ang biktima sa pagtrabaho sa guba nga relo dihang giduol ug gipusil sa makadaghang higayon sa riding-in-tandem nga maoy nakaigon sa hinanali niining kamatayon.

Dali usab nga misibat palayo sa dapit ang mga mamumuno.

Nagpadayon pa ang imbestigasyon sa kapolisan aron pagsuta sa motibo sa maong pagpamusil.

Samtang ang kapolisan sa Presinto 1 sa Mandaue City Police Office padayon sab karon nga mihimo og imbestigasyon pagsuta sa nahitabong pagpamusil sa usa ka mekaniko sa mga sakyanan sa dalan A. Del Rosario, Brgy. Mantuyong niadtong Sabado pasado alas dos sa hapon.

Si Police Master Sergeant Marino Lofranco sa naasoy nga presinto miila sa biktima nga si Michael Remulta, 32-anyos, nagpuyo sa  dalan Plaridel, Brgy. Alang-Alang sa maong dakbayan.

Matud niini nga biktima nag-ayo og motorsiklo uban sa laing mekaniko sa dihang giduol sila og usa ka wala mailhing tawo nga nagsul-ob og half-face helmet ug bonnet mask, dayong pusil ngadto sa biktima sa makadaghang higayon.

Dugang ni Lofranco nga human mamusil, dali nga miangkas sa nagpaabot nga kaubang nagsakay og motorsiklo ang mamumuno dayong pabulhot pahilayo sa dapit.

Ang mga sakop sa Accident Control and Emergency Response Team (ACERT) nga mitubag sa maong alarma ang misuway og luwas sa biktima apan nakabsan kini sa kinabuhi.

Si Lofranco miingon nga nakakuha nila sa crime scene ang 14 ka kabhang ug lima ka slug sa .45 nga pistola ug motorsiklo nga walay plate number. (/DILT)(BANATNEWS)