Repollo wala atol sa drug raid nga gihimo?

CEBU, Philippines – Nipadayag sa iyang kasagmuyo ang direktor sa Cebu City Police Office (CCPO) Police Colonel Royina Garma tungod kay wala mopatim-aw si Kapitan Kirk Bryan Repollo sa Barangay Inayawan atol sa ilang operasyon sa barangay diin 18 ka kilong shabu ang nakompiska.

Kini mao’y gitubag ni Garma sa mga pangutana kon ang opisyales sa maong barangay aktibo ba sa gubat batok sa ginadiling drugas.

Matud ni Garma nga labing maayo unta kong ang kapitan sa barangay naa atol sa gihimong anti-illegal drug operation.

“I was there kasi when the 18 kilos were seized and we were looking for a barangay representative meron naman nag-appear na barangay representative to witness anyway under the law hindi naman mandatory na kapitan ‘yon but siguro since it is a 18 kilos drugs seized on your area of responsibility para sakin on my opinion I think it would be better siguro kung the father of the barangay should have appeared”, matud ni Garma.

Matud usab ni Garma nga atol sa ilang operasyon nagpundo sila diha sa barangay gikan sa alas 3:00 sa kadlawon ug nihawa pasado alas 8:00 na sa buntag.

Bisan paman sa kasungian nga nahitabo tali sa kapitan ug kapolisan malaumon si Garma nga ang construction sa Pardo Police Station Satellite Office mapadayon.

Ang Banat News nisuway og kuha sa habig ni Repollo pinaagi sa pagpadala og text message apan hangtud sa oras sa pagsuwat niining balita wala’y tubag sa maong message ang kapitan. (/BDB)(BANAT NEWS)