Igsuon sa ‘drug supplier’ gipatay

CEBU, Philippines – Babayeng gipatay sa Barangay Labogon, Dakbayan sa Mandaue niadtong Miyerkules sa gabii igsuon sa babayeng gitumbok nga tigsuplay niadtong P190milyones nga kantidad sa shabu didto sa Lungsod sa Consolacion.

Ang gipatay nga si Janelyn Encila,31, igsuon sa nadakpan na nga si Jocelyn Encila.

Ang hepe sa Mandaue City Police Station 3 , nga si  Police Captain Ramil Morpos mibutyag sa Banat News nga sa wala pa nakanaog si Janelyn sa taxi dihang giguyod siya sa usa sa duha ka mga mamumuno ug gipusil gawas sa maong taxi.

Uban sa biktima ang iyang uyab ug ang 14 anyos nga babayeng anak ni Jocelyn. Ang mga mamumuno giingong nagsul-ob og full-faced helmet ug nagtaptap sa nawong.

Tulo ka mga samad pinusilan ang nahiagoman sa biktima nga maoy hinungdan sa iyang hinanaling kamatayon.

Napalgan sa nahitaboan ang upat ka mga kabhang sa gituohang mga bala sa kalibre .45.

Gikan ang tulo naghatod og gamit ni Jocelyn ug sa ilang ginikanan didto sa Consolacion Detention Cell sanglit dad-on na sila pagkasunod adlaw sa Cebu Provincial Detention and Rehabilitation Center.

Sumala pang Morpos human nadakpan si Jocelyn  gisulong ang balay ni Janelyn sa mga wala mailhing lalaki ug giukay ang mga gamit niini samtang wala kini didto.

Nakamatikod sab kini nga pirmeng dunay magsunod-sunod kaniya nga wa mailhing mga tawo.

Niadtong Martes, midangop sa ilang estasyonan ang biktima aron ipa-blotter ang namatikdan nga magsunod-sunod nga mga wala mailhing tawo.

Matud ni Entoma nihangyo si Janelyn nga hatagan siya og security tungod sa nahitabo.

“Di mi makahatag og security mao ‘tong gitambagan namo siya nga ipa blotter aron paagian og patrol iyang balay,” si Entoma nagkanayon.

Wala na hinuon mitug-an ang maong hepe kun unsa pa ang gipangbutyag ni Janelyn sa polis.

Ang direktor sa Mandaue City Police Office nga si Police Colonel Julian Entoma miingon sa Banat News nga ilegal nga drugas ang motibong ilang gitan-aw pagpatay kang Janelyn.

Si Entoma nagkanayon nga base sa ilang imbestigasyon, si Janelyn miyembro sa drug group sa drug lord nga si Rustico Ygot kinsa napriso karon sa National Bilibid Prisons.

Matud pa ni Morpos, si Janelyn maoy tig-remit sa mga halin sa ilegal nga drugas ngadto sa ilang tinubdan.

Nasayran nga bago lang natumbok nga aktibong namaligya og drugas si Ygot pinaagi sa iyang kanhi uyab nga si Jocelyn.

Si Jocelyn ug ang ilang mga ginikanan gidakop niadtong Domingo sa buy bust operation ug nakuhaan sila og napulo ka kilong shabu.

Follow-up operation kadto human si Jocelyn gitumbok nga maoy tinubdan sa 18 kilong shabu nga nakuha gikan sa dinakpang si Elymar Tampos Ancajas, didto sa Barangay Inayawan, Dakbayan sa Sugbo.

“Basin og gipapatay na siya sa iyang kauban kay nisumbong na siya sa polis,” sigun ni Entoma. (/IBM)(BANAT NEWS)