Hustisya sa kamatayon sa mga tanod

CEBU, Philippines — Dungan sa paglubong, hustisya ang singgit sa mga anak ug kabanay sa duha ka tanod ug usa ka asawa niini sa Barangay Lusaran, Dakbayan sa Sugbo atol sa operasyon sa kapolisan niadtong miaging semana.

Kahinumduman nga ang kapolisan mipahigayon og Synchronized Enhanced Managing Police Operations (SEMPO), usa ka anti-criminality drive sa rehiyon.

Ang team sa Cebu Mobile Force Company (CMFC) mi-serve og managlahing search warrants labot sa loose firearms batok nilang Renato Gogc-ong ug Reynaldo Laguna.

Ang duha namatay human suway nga misukol sa kapolisan samtang ang asawa ni Renato nga si Emma giingong suway nga mitabon sa iyang bana hinungdan nga kini naangin dihang nagsinukliay og bala.

Sa maong hitabo, samara ang sakop sa CMFC nga si PO3 Pacheco Pulgo kinsa kasamtangan pa karong nagpaalim sa iyang samad sa tiyan.

Kagahapon hingpit na silang gihatud sa katapusang kapahulayan diin usa ka santos nga misa ang gihimo sa gym sa naasoy nga bukirang barangay.

Kini gitambungan sa ilang pamilya, higala ug mga konsehal sa siyudad, North District Congressman Raul del Mar ug Mayor Tomas Osmeña aron mopadangat sa ilang pahasubo.

Ang mga anak nila ni Renato ug Emma nga sila si Reina Mae ug Renato Goc-ong Jr. mihatag og mensahe ug wala nila kapugngi ang pagpadayag sa ilang kasagmuyo ug kalagot gihimo sa kapolisan ngadto sa ilang mga ginikanan.

Gilubong ang tulo sa Cambinucot Public Cemetery. Si Konsehal Margarita Osmeña miasoy nga motabang ang kagamhanan sa nabiyaang pamilya nila ni Renato ug Emma ug kini nanghinaut nga ang kalagot nga gibati sa mga anak sa namatay, hinay-hinay nga mawala ug makapadayon sila sa ilang kinabuhi. (/DILT)(BANATNEWS)