Nisukol atol sa buy-bust patay
CEBU, Philippines — Patay ang usa ka 45-anyos nga lalaki human kini nisukol atol sa buy- bust operation sa mga tinugyanan sa Police Station 2 sa Mandaue sa may Back Matimco, Barangay Subangdako, Mandaue City, Sabado sa hapon. Ang nakalas naila nga si Dandy Laurel Perez, residente sa maong lugar.
Nangulo sa maong operasyon ang hepe sa Station 2 Police Major Antonio Detuya uban sa pakig-alayon sa Philippine Drug Enforcement Agency-7.
Matud pa ni Detuya ang poseur buyer nga polis nakapalit og shabu sa suspek apan nakamatikod kini dayon ug gitukmod ang polis dayong sutoy dagan sa ilang balay.
Dali siyang gigukod sa mga polis apan nikuha diay og armas ang suspek ug gipamusil ang mga polis apan way naigo hinungdan nga nakabawos ug kini maoy napatay.
Gidala kini sa Mandaue District Hospital apan gideklarar kini sa mga mananambal nga dead on arrival. Nasakmit gikan kang Perez, ang mga pinutos sa ilegal nga drugas, sudlanan niini, buy-bust money, P940 nga gituohang halin ug .22 revolver black widow nga may mga bala.
Padayon karon ang pagmonitor sa kapulisan sa mga nalambigit sa ilegal nga drugas sa ilang lugar. (/IBM)(BANATNEWS)
- Latest