Dakbayan sa Sugbo mohatag og P3.2M nga graduation subsidy
CEBU, Philippines — Ang kagamhanan sa Siyudad sa Sugbo mohatag og P3.2 milyones alang sa graduation subsidy sa tanang public elementary ug secondary schools.
Si City Councilor Joy Augustus Young, deputy mayor for education nibutyag nga mogahin ang siyudad og P150 nga graduation subsidy matag estudyante.
Sa record sa Department of Education Division of Cebu City adunay 14,958 ka grade six pupils sa elementary ug 6,423 senior high school students nga mogradwar karong tuiga.
Ang maong sugyot giaprobahan atol sa regular session sa konseho niadtong Martes.
Sa niaging tuig, nagpinirmahay ang siyudad ug DepEd Cebu City Division sa memorandum of agreement kalabot sa paghatag og ayuda sa 122 ka eskwelahan.
Sa maong MOA, ang siyudad mohatag og assistance sa mga eskwelahan tungod kay tanang bata adunay katungod sa edukasyon.
Ang DepEd kinahanglan usab nga mosumiter og liquidation report alang sa maong ayuda nga gihatag sa siyudad matag buwan sa Hunyo.
Ang syudad migahin og P5 million alang sa maong ayuda sa miaging tuig samtang P3.2 million ang gigahin sa siyudad karong tuiga. (/BDB)(BANATNEWS)
- Latest
