Counting machines testingan karon

CEBU, Philippines — Himuon sugod karong adlawa ang pag-testing sa mga Voting Counting Machine (VCM) sa Dakbayan sa Talisay nga molungtad sa Marso 4. Subay niini, si Atty. Gallardo Escobar, ang election officer sa siyudad midapit sa katawhan sa pagsalmot sa maong kalihukan aron inig abot sa adlaw sa piniliay, suhito kun unsaon paggamit ang makina.

Giawhag sab ni Escobar ang mga watchers sa mga kandidato nga motunga karong adlawa aron matudloan sila sa ilang angay nga bantayanan o matabangan ang mga botante.

Ang maong kalihukan himuon sa South Town Center Mall sa may Barangay Bulacao.

Ipahigayon sab unya ang ilang training sa mga magtutudlo kalabot sa Voters Registration Verification System (VRVS). Sa sunod nga semana, magpahigayon usab sila og Oplan Baklas aron mahawanan ang palibot sa dagway sa mga kandidato lakip na ang ilang tarpaulin greetings.

Hinuon una nang mipahibawo si Escobar nga sa iyang pagsuroy, wala siyay nakitang mga national nga kandidato nga nakalapas sa lagda sa pagpapilit sa ilang mga tarpaulin.   DILT (BANAT NEWS)