Senior biktima sa Bodol-Bodol Gang diha sa Talisay

CEBU, Philippines – Usa ka senior citizen ang nabiktima sa bodol-bodol didto sa Barangay Tabunok, Dakbayan sa Talisay niadtong Lunes sa gabie.

Si Zoila Derama, 81 anyos nga taga Barangay Lawaan 1 sa maong syudad nidangop sa kapulisan human wala na niya makita ang wa mailhing mangingilad.

Siya nisaysay sa kapulisan nga gikan siya nga nagpalit og insulin sa botika sa lugar ug nilingkod diha sa may tindahan sa aron mupahuway.

Usa ka babaye nga wa niya mailhi ang niduol kaniya nga nagpakaaron-ingnon nga klasmeyt sa iyang anak kaniadto.

Wa magdugay gihagad siya nga ipamembro sa Australian Foundation aron makadawat og bugas, tambal ug uban pang mga kaayohan.

Gihangyo si Derama sa mangingilad nga isulod sa bag ang iyang kwentas, duha ka bangles, lima ka paresan sa ariyos, tulo ka sing-sing ug P12,000 nga salapi.

Gani nihatag pa og P500 ang babaye nga mangingilad og gisugo ang senior sa pagpalit og sobre.

Nituman ra sab ang biktima sa mga sugo sa suspek hangtud nga sa iyang pagbalik wala na ang babaye nga iyang gikaestorya lakip na ang iyang bag ug mga alahas. - /LPM (BANAT NEWS)