Suplay sa ecstasy mohinay

CEBU, Philippines – Si Philippine Drug Enforcement Agency-7 regional director Wardley Getalla, miklaro nga human nakalas ang giingong supplier sa party drugs nga ecstasy nga si Ken Kenneth Rosales, giingong medyo mihinay ang suplay niini dinhi sa Sugbo.

Pangagpas ni Getalla nga posibleng mipahuway usa ang mga nalambigit niini o kaha nahadlok pa sa pagka karon human sa kamatayon ni Rosales.

Apan bisan paman niini, ila gihapong ipadayon ang pag monitor sa maong mga tawo nga nalambigit sa pagpamaligya og ecstacy kay sayod sila nga adunay mosunod pagpayuhot og mga party drugs.

Basi sa ilang impormasyon nga nakuha, 300 ngadto sa 500 ka mga tabletas sa  ecstasy ang nakasulod sa Sugbo, ilabi na kon adunay mga dagku nga mga kalihukan.

Awhag ni Getalla sa mga ginikanan nga kinahanglan anha magsugod sa ilang balay ang drug campaign ilabi na ngadto sa mga anak hilig og party aron malikayan ang paggamit niini ug uban pang mga ilegal nga drugas.

Gidasig sa direktor sa PDEA-7 ang katawhan nga motaho dayon sa ilang buhatan sa higayon nga adunay mabantayan nga nagpayuhot og ilegal nga drugas o party drugs sa ilang lugar kay ang maong problema, suliran kini sa tanan hinungdan nga kinahanglan ang pagtinabangay. (/DILT)(BANAT NEWS)