Duha patay sa aksidente sa kadalanan
CEBU, Philippines — Duha ang patay usa niini menor de edad human nibangga ang gisakyan nilang motorsiklo ngadto sa multicab niadtong Biyernes sa gabii diha sa national highway sa Barangay Bolinawan, Dakbayan sa Carcar.
Ang namatay giila nga si John Michael Ondoy, 27-anyos, ulitawo taga Dan Poblacion 1 sa maong siyudad, drayber sa Honda big bike ug ang sakay niini nga si Rolex Emnace, 16-anyos.
Samtang naangol si Guillpa Jorry Malipaonon, 29-anyos taga Casuntingan, Dakbayan sa Mandaue drayber sa Honda DMX.
Matud ni Police Officer 1 Francisco Saberon, desk officer sa Carcar City Police Station nga ang motorsiklo ug multicab nga gimaneho ni Romel Ruiz, 43-anyos, minyo, taga Barangay Pooc, Dakbayan sa Talisay nagbiyahe kini sa samang direksiyon gikan sa Carcar proper paingon sa Barangay Ocaña sa maong siyudad samtang si Malipaonon padulong sa Dakbayan sa Sugbo.
Matud ni Saberon nga pag-abot diha sa lugar nga nahitaboan aksidente nga naigo ni Ondoy ang multicab ug tungod sa kakusog sa impact nalagpot si Ondoy ug Emnace.
Ang motorsiklo nga gisakyan sa duha niigo ngadto sa motorsiklo nga gimaneho ni Malipaonon.
Si Ondoy, Emnace ug Malipaonon daling gidala ngadto sa tambalanan apan nakabsan sa kinabuhi si Ondoy ug Emnace samtang si Malipaonon nagpabilin pa kini sa tambalanan. BDB (BANATNEWS)
- Latest