Siyam patay, duha gi-salvage

CEBU, Philippines —  Patay ang pito ka mga suspek sa operasyon sa kapolisan kontra krimen diin usa ka polis ang naangol samtang duha usab ka mga lalaki ang biktima sa salvaging sa miaging Huwebes sa gabii hangtud kagahapon sa udto sa gihimong Synchronized Enhanced Managing Police Operation (SEMPO) ang gilusad sa kapolisan dinhi sa Sugbo .

Unang gironda sa kapolisan ang Barangay Lusaran, Dakbayan sa Sugbo tungod sa paghupot og illegal nga armas sa duha ka mga barangay tanod.

Ang tanod nga si Renato Bughaw Goc-ong maoy unang gironda apan nisukol kini ug naamong ang iyang asawa ug napatay sab sa mga polis.

Butyag sa direktor sa Cebu City Police Office nga si Police Senior Superintendent Royina Garma, nasugatan sa mga polis ang asawa  ni Goc-ong nga si Emma Bajad Goc-ong ug ila kining gipahibawo sa ilang tuyo sa bana niini.

Apan sa pagsulod niini sa balay nanirado kini sa tanang bintana ug pultahan hinungdan nga gilili kini ni PO3 Pacheco Pulgo apan adunay mipusil kaniya gikan sa sulod.

Swerteng nakasuot og bullet proof vest si Pulgo ug bun-og lang ang nahiaguman niini.

Ang mga backup ni Pulgo maoy mipusil kang Renato apan giingong gitabunan kini sa iyang asawa maong apil kini sa napatay. Matud ni Garma nga klase-klaseng mga armas ang nasakmit sa maong lugar.

Apil sa gironda ang balay sa laing tanod nga si Reynaldo Laguna apan sama ni Goc-ong nisukol kini maong napatay sab.Dunay nakuhang mga armas gikan kaniya.

“They are identified as mga goons and sometimes used during elections or clearing the area. So this is in line sa program to make sure lahat ng baril ay hindi magamit sa elections,” si Garma nagkanayon.

Nadakpan sab sa search warrant sa paghupot og loose firearms silang Lusaran Barangay Kapitan Agustin Partulan, ug Kapitan Victor Borres Quijano Jr., sa Barangay Calamba; Anthony Gingoyon, chief tanod niini; ug si Ramsey Mercado, barangay kagawad sa maong barangay.

Giangkon ni Quijano nga aduna siyay armas ug lisensyado kini, apan nagdumili na siya sa pagtubag sa ubang mga pangutana sa media.

Ecstacy

Kadungan sab nianang mga orasa ang buy bust operation diha sa General Sepulveda St., Barangay Zapatera batok nilang Justin Anton Jimenez ,21, ug si Lorenz Jasper Famoso Yap ,22, mga tinun-an sa usa ka dakong unibersidad sa siyudad nga nakuhaan  og nagkadaiyang klase sa gituohang party drugs nga ecstasy.  Matud pa sa hepe sa Regional Intelligence Division nga si Police Senior Superintendent Remos Medina ang duha mitumbok ni Ken Kenneth Manalastas Rosales, 31, taga Tres Borces Street, Barangay Mabolo nga tinubdan sa ilang drugas.

Apan dihang giadto sa mga polis, giingong nakigpinusilay si Rosales hinungdan nga napatay.

Matud ni Medina naapil sa ilang Party Drug Matrix si Rosales ug kini adunay direktang kontak sa big boss sa Manila nga usa ka babaye.

Nagtuo si Medina nga silang Jimenez maoy napalitan sa 19-anyos nga si Ashley Abad sa ecstasy nga nakapatay niini tungod sa overdose niadtong bisperas sa Sinulog.

“Sila ‘yung nagdi-distribute. Siya naman ang pinapasahan sa baba para sa mga users,” sigun ni Medina.

Daanbantayan

Patay sab kagahapon sa Barangay Maya, Daanbantayan ang usa ka Cristory Monteadora nga gihatdan og search warrant tungod sa pagpamaligya og ilegal nga drugas.

Sigun ni Chief inspector William Homoc nakigpinusilay kanila si Monteadora ginamit ang iyang kalibre .9mm nga armas apan kini maoy napatay.

Cordova

Samtang sa Barangay Pilipog, Lungsod sa Cordova napatay sab ang duha ka mga giingong tigpayuhot sa ilegal nga drugas human nakigpinusilay sa mga operatiba sa Cordova Police Station.

Giila ang napatay mao ang usa ka alyas Moises nga giingong apil sa drug watch list ug kaubang si Librado Abayan alyas Badong ,32, taga Barangay Ermita, Dakbayan sa Sugbo.

Samtang nadakpan ang tulo nila ka mga kauban Andrew Baguio; Matthew Monsalud; ug Johnny Monsalud.

Gipang-salvage

Sa Dakbayan sa Talisay, duha ka mga lalaki nga gituohang biktima sa summary executions ang napalgan sa karsada sa Sitio Ibabaw, Barangay Maghaway kagahapon sa alas 4 sa kaadlawon.

Ang mga biktima mao sila si Mark Kernaez, taga Barangay Lagtang ug Gabby Gabisan, 41, taga Barangay San Roque sa maong siyudad. Ang usa kanila gibinaklid og tie wire.

Ang mga residente nitug-an sa mga otoridad nga nakadungog sila og mga masipang buto sa armas apan wala sila nigawas tungod sa kahadlok.

Mga 150 metros gikan sa gikahagbaan sa mga biktima adunay usa ka Suzuki Smash nga adunay plakang 070102 nga gipanag-iya ni Juriel Minguito ang gikostudiya sa kapolisan tungod kay gipasagdan lang kini.

Si Supt. Marlu Conag, pangu sa kapulisan sa siyudad mosusi kun konektado sa maong pagpatay ang motorsiklo.

Ang mga sakop sa Scene of the Crime Operatives (SOCO) nakakuha og usa ka bala, 11 ka basiyo ug upat ka slug sa wa pa matinong kalibre sa armas ingon man kable ug bakus.

Asoy pa ni Conag nga drug personalities ang mga gipatay sumala sa ilang pagsusi sa background.  Gabriel Bonjoc IBM (BANATNEWS)