‘Pushers’ sa Mandaue, Talisay sikop

CEBU, Philippines — Nadakpan ang mga gikatahapang tigpayuhot og ilegal nga ‘shabu’ sa sunod-sunod nga mga buy bust operation didto sa syudad sa Mandaue ug Talisay.

Upat ka mga pusher ang nasakmitan og shabu didto sa  Purok Lubi, Brgy Canjulao sa Mandaue City nga giilang si Marilou Racho Carmelo, 32, samtang kauban niya nga gisikop si Ronald Libre Flores, 35.

Ang hepe sa Presinto 3 sa Lapu-Lapu  City Police Office (LLCPO) nga si Chief Inspector Wyne Magbanua  miingon nga nasakmit nga mga ebidensiya gikan sa maong mga dinakpan mao ang pito ka gagmay nga paketeng shabu ug P300  nga buy bust money.

Laing nadakpan sa  Purok Orchids, Barangay  Looc  sa maong dakbayan alas 5  pasado ang takna sa buntag mao si  Larita  Gallego Patalinghug, 40 nga taga-Purok Orchids,Brgy Looc  sa maong dakbayan.

Dugang nadakpan mao si  Michelle Montero Pagubo, 23  anyos  nga nagpuyo gihapon sa maong dapit ug nakuha gikan kanila ang walo ka gagmay nga paketeng shabu ug P300  nga buy bust money.

Samtang didto sa Talisay, miabot sa usa ka milyon ka pesos nga balor sa drugas ang nasakmit gikan sa upat ka durugista nga nasikop didto sa sitio Manggahan, Barangay Cansojong niadtong Miyerkules sa gabie.

Ang grupo sa Provincial Drug Enforcement Unit (PDEU) ug ang Provincial Intelligence Branch (PIB) naghiusa sa ilang operasyon human ilang nadawat ang sunod-sunod nga reklamo labot sa ilegal nga negosyo ni Marc Tapis, 35 anyos, minyo nga nagpuyo sa maong lugar.

Gipalitan sa operatiba si Tapis og ilegal nga drugas hangtud nga nagmalampuson kini.

Gawas ni Tapis nasikop sab ang iyang mga kaubanan sa lugar nga sila Jerry Regudos, 33 anyos, ulitawo; Rene Rabanes, 44 anyos, minyo ug si Rosell Dacayana, 27 anyos nga pulos nagpuyo sa maong lugar.

Nakuha gikan sa mga dinakpan ang lima ka dagko nga pakite, tulo ka medium nga pakite ug 41 ka gagmay nga pakite sa ginadiling drugas.

Lakip sa nasakmit ang P16,000 nga buy-bust money, P10,000 nga gituohang halin, timbangan, drug paraphernalia sa pag-repack ingon man sa pagsuyop ug duha ka video karera machine.  Gabriel Bonjo LPM (BANAT NEWS)