P3M shabu, 14 nasikop
CEBU, Philippines – Mokabat P3 milyones nga balor sa ilegal nga drugas ang nasakmit sa managlahing operasyon kontra ilegal nga drugas sa Dakbayan sa Danao ug sa Naga.
Sa Danao, kapin o kulang P2.5 milyones nga gidudahang shabu ang nasakmit sa buy-bust operation sa unom ka mga barangay gikan sa Lunes sa gabii hangtod Martes sa buntag nga gipangulohan sa hepe nga si Police Supt. Maribel Getigan ug 12 ka tawo ang nadakpan.
Ang gironda mao ang Barangay Maslog; Tuburan; Suba; Looc; Taytay ug Guinacot nga gikasikop nila ni Claire Almagro, Ricky Escodero; Ramises Jake Pepito; Oliver Castillote; Niño Sumalinao; Khit Sta. Teresa; Ramon Mosqueda Jr; Jason Pepito Jr; Arnold Roble ug Sherjan Namli.
Nasakmit gikan sa mga dinakpan ang walo ka dagko nga putos, dose ka medium sa plastic nga puros gituohan nga shabu nga motimbang og 378 gramos nga mobalor ug 2,570,000 base sa Dangerous Drug Board Value.
Samtang sa Naga, tunga sa milyon ka pesos nga kantidad sa shabu ang nasakmit sa duha ka lalaki diha sa Barangay North Poblacion, Dakbayan sa Naga kagahapon sa alas 6:30 sa buntag.
Ang duha giila sila si John Paul Pantorilla alyas Jepoy, 29, ug si Bresnev Quimada alyas Nevnev, 29, taga Barangay Tuyan sa maong siyudad.
Ang grupo nila ni St. Insp. Alejandro Batobalonos sa Provincial Intelligence Branch (PIB) nakadawat na og daghang reklamo batok ni Pantorilla.
Nakuha gikan sa duha ang 15 ka medium nga paketeng gidudahang shabu, 15 mil pesos nga buy bust money, usa ka .9mm nga armas nga dunay mga bala.
Ang drugas nga nakuha gibana-banang balor P544 mil. (Romeo Limpangog ug Gabriel Bonjoc/IBM)(BANAT NEWS)
- Latest
