Tulo nurses taktakon

CEBU, Philippines – Ipatangtang sa Provincial Health Office ang tulo ka nurses nga giingong nikuha og video sa usa ka lalaking pasyente sulod sa Tuburan Distrcit Hospital ug gi-upload sa social media site nga Facebook.

Matud ni Dr. Rene Catan ang pangulo sa PHO nga tangtangon ang tulo base na usab sa rekomendasyon sa grievance committee sa Kapitolyo.

“The grievance committee have found out direct responsibility and of course liability atong duha ka nurses who took the video and who sent the video to the social media,” matud ni Catan.

Ang rekomendasyon paaprubahan pa kang Gobernador Hilario Davide III.   Sa tulo ka mga nurses, duha ang nikuha sa video ug ni-upload niini samtang ang usa nikuha ra og hulagway apan bisan pa, matud ni Catan kalapasan gihapon kini.

Gawas sa tulo adunay permanent midwife nga nangayo og kopya sa video ug karon ang Human Resource Department sa Kapitolyo na maoy modesisyon.

Ang mga job orders nga adunay dakong nabuhat nga kalapasan diretso kini matangtang sa trabaho samtang ang mga regular ug casual moagi pa sa Committee on Discipline and Investigation (CODI).

Si Catan pabiling niinsister nga wala silay nakitang kalapasan kalabot sa pag-atiman sa mga medical personnel kang Jimbe Casas, ang drug personality nga gidala sa maong tambalanan ug nakuhaan sa video nga nagkaligo sa iyang kaugalingong dugo niadtong Pebrero 8. Si Casas namatay sa maong tambalanan.

Ang PHO nihatag na og kopya sa preliminary investigation result nga gihimo sa hepe sa Tuburan District Hospital nga si Dr. Stevan Ligaray ngadto sa DOH.

Si Catan subling nipahimangno sa mga medical staff sa 16 ka provincial ug district hospitals nga dili mokuha og hulagway o video sa ilang mga pasyente sanglit kalapasan kini sa Data Privacy Act ug ingon man sa memorandum sa Kapitolyo.

Ang nahitabo sa Tuburan District Hospital mao na ang ikatulo nga insidente diin aduna nay natangtang nga mga medical personnel tungod sa paggamit sa social media sa pagtubag sa mga issue sa mga tambalanan sa probinsya.

Niadtong niaging tuig, si Atty. Mark Tolentino ang provincial administrator nipagawas og memorandum kalabot sa polisiya sa social media alang sa mga empleyado sa Kapitolyo.

Ang mga empleyado, gikan sa regular ngadto sa JO gidili pagkomento o pag-post pinaagi sa ilang social media account kalabot sa ilang reklamo bahin sa ilang mga trabaho o sa ilang mga labaw.

“Work related grievances should be channelled properly  to the Committee on Discipline and Investigation (CODI) for its resolution,” pagbasa sa memorandum ni Tolentino plinetsahan Abril 30, 2018. (/IBM)(BANAT NEWS)